ҚР Салық кодексінің 244-бабына сәйкес – 1. Қызметтік іссапарлар кезіндегі өтемақылар бойынша мынадай шығыстар шегерімге жатады:

1) жол жүруге арналған және броньға жұмсалған шығыстарды растайтын құжаттардың негізінде, броньға жұмсалған шығыстардың төлемақысын қоса алғанда, іссапарда болатын жерге және кері жол жүру шығыстары. Жол жүру электрондық билетпен немесе электрондық жол жүру құжатымен ресімделген жағдайда, жол жүруге арналған және броньға жұмсалған шығыстарды растайтын құжаттар мыналар болып табылады:

·        электрондық билет, электрондық жол жүру құжаты;

·        электрондық билеттің, электрондық жол жүру құжатының құнын төлеу фактісін растайтын құжат;

·        тасымалдаушы немесе электрондық билет немесе электрондық жол жүру құжаты сатып алынған тұлға берген жол жүру фактісін растайтын құжат (оның ішінде отырғызу талоны) қағаз жеткізгіште немесе электрондық түрде.

Осы тармақшада көзделген шығыстарға бір елді мекеннің шегінде жол жүру жөніндегі шығыстары жатпайды;

Жұмыскер еңбек міндеттерін орындайтын, оны оқыту, біліктілігін арттыру немесе қайта даярлау жүзеге асырылатын жұмыскерді іссапарға жіберу туралы бұйрықта немесе жұмыс берушінің жазбаша өкімінде көрсетілген межелі орын іссапар орны болып табылады;

іссапарда болу уақыты:

·        жұмыскерді іссапарға жіберу туралы жұмыс берушінің бұйрығы немесе жазбаша өкімі;

·        шығу және келу күндерін қоса алғанда, жол жүруді растайтын құжаттарда көрсетілген іссапар орнына кету және кері қайту күндеріне сүйене отырып, іссапар күндерінің саны. Мұндай құжаттар болмаған кезде іссапар күндерінің саны салық төлеушінің салықтық есепке алу саясатында көзделген іссапар орнына кету күнін және (немесе) кері қайту күнін растайтын басқа да құжаттар негізге алына отырып айқындалады.

Қызметтік іссапарларға, оның ішінде шет мемлекеттерге арналған шығыстарды бюджет қаражаты есебінен өтеу қағидаларына сәйкес:

Іссапарға жіберілген жұмыскерге мынадай шығыстар өтеледі:

3) іссапарда болатын жерге және тұрақты жұмыс орнына кері қарай жол жүру бойынша (іссапарға жіберілген тұлғаға әкімшілік тиісті қозғалыс құралын ұсынатын жағдайлардан басқа) көрсетілген жол жүру құжаттарының (жол жүру билеті мен отырғызу талонының, автобуспен жол жүрген кезде тек жол жүру билетінің) негізінде теміржолмен жүрген кезде – купе вагонының (жұмсақ дивандары төменде орналасқан, қалпын реттеу құрылғысы бар отыруға арналған жұмсақ креслолы екі орындық купе (ҰВ) вагондарды қоспағанда) тарифі бойынша; су жолдарымен, тас және қара жолдармен – сол жергiлiктi жерде қолданылып жүрген жол жүру құны бойынша;

5) iссапарға жіберілген жерге және тұрақты жұмыс орнына кері қарай жол жүру құжаттары болмаған кезде шығыстар осы тармақтың 3) тармақшасында көрсетiлген көлiкпен (әуе көлiгiн қоспағанда) жол жүрудiң ең төменгi құны бойынша өтеледi;

6) темiржол станциясына, айлаққа, әуежайға, егер олар елдi мекен шегінен тыс орналасса, растайтын құжаттар болған кезде автокөлiкпен (таксиден басқа) жол жүру бойынша;

7) мемлекеттік мекеменің басшысы, сондай-ақ мемлекеттік мекеменің бірінші басшысының рұқсатымен мемлекеттік мекеме басшысының орынбасары, орталық мемлекеттік органның аппарат басшысы жақын аудан және облыс орталықтарына қызметтік автокөлікпен іссапарға жіберілген кезде көлік шығыстары;

ҚР Еңбек кодексінің 127-бабының 2, 3-тармақтарына сәйкес іссапарларға жіберілетін жұмыскерлерге: іссапарда болған күнтізбелік күндері үшін, оның ішінде жолда болған уақыты үшін тәуліктік ақы; баратын жеріне бару және кері қайту шығыстары; тұрғын үй-жайды жалдау шығыстары төленеді.

Жұмыскерлерді іссапарға жіберудің шарттары мен мерзімдері еңбек, ұжымдық шарттарда немесе жұмыс берушінің актісінде айқындалады.