Лауазымдық міндеттер - бұл қызметкердің өз құзыреті шеңберінде орындауға міндетті өз жұмыс орнындағы еңбек функциясы.

Жұмыскердің лауазымдық міндеттері жұмыскердің еңбек шартында да, жұмыскердің лауазымдық нұсқаулығында да жазылуы мүмкін.

Лауазымдық нұсқаулық еркін нысанда жасалады, бірақ оны жасаған кезде мынадай нормативтік құжаттардың талаптарын ескеру қажет: Басшылар, мамандар және басқа да қызметшілер лауазымдарының біліктілік анықтамалығы және негізгі лауазымдық міндеттері мен жұмыскерлердің лауазымдарына нақты мамандарға қойылатын біліктілік талаптары регламенттелген Жұмыстар мен жұмысшы кәсіптерінің бірыңғай тарифтік-біліктілік анықтамалығы, жұмысшылар кәсіптерінің тарифтік-біліктілік сипаттамалары.

Жұмыскерлерге қойылатын біліктілік талаптары және белгілі бір жұмыс түрлерінің күрделілігі республикада қолданыстағы біліктілік анықтамалықтары мен жұмысшы кәсіптері мен қызметшілердің лауазымдары бойынша мінездемелер негізінде белгіленеді (Еңбек кодексінің 101-бабының 8-тармағы).

Оларды әзірлеу және қолдану тәртібі Қазақстан Республикасы Денсаулық сақтау және әлеуметтік даму министрінің 2015 жылғы 21 желтоқсандағы № 982 бұйрығымен бекітілген Қағидаларда белгіленген (тіркеу № МЮ 12631).

Жұмыскерлердің лауазымдық міндеттерінің нақты тізбесі жұмыс беруші әзірлейтін және бекітетін лауазымдық нұсқаулықтармен белгіленеді (Қағидалардың 25-тармағы және БА 5-тармағы).

Жекелеген қызмет түрлеріне тән лауазымдарға біліктілік сипаттамаларын еңбек жөніндегі уәкілетті мемлекеттік органның келісімі бойынша тиісті қызмет салаларының мемлекеттік органдары әзірлейді және бекітеді (Еңбек кодексінің 16-бабының 17) тармақшасы).

Бiлiктiлiк анықтамалықтары мен сипаттамаларының негiзгi мақсаты қызметкерлерге бiлiктiлiк талаптарын қою, бiлiктiлiк санаттары мен разрядтарын белгiлеу, оларды кадрларды iрiктеу мен орналастыру, мамандықтар мен бiлiктiлiкке сәйкес ұтымды орналастыруға және оларды тиiмдi пайдалануға бақылауды жүзеге асыру, сондай-ақ басшыларды, мамандар мен басқа да қызметшiлердi аттестаттаудан өткiзу болып табылады.

Осылайша, жұмысқа қабылдау кезiнде республикада қолданылып жүрген бiлiктiлiк анықтамалықтары мен сипаттамаларын басшылыққа алған жөн. Олардағы лауазымдар мен кәсіптерге жұмыс беруші лауазымдық және жұмыс нұсқаулықтарын әзірлейді және бекітеді. Қолданыстағы біліктілік анықтамалықтарында және сипаттамаларында жоқ лауазымдарға жұмыс беруші біліктілік сипаттамаларын дербес әзірлеуге және оларды еңбек заңнамасына сәйкес қолданысқа енгізуге құқылы.