«Жарнама туралы» Заңның 3-бабында «жарнама» және «сыртқы (көрнекі) жарнама» сияқты ұғымдар регламенттелген.

Жарнама - кез келген құралдардың көмегімен кез келген нысанда таратылатын және (немесе) орналастырылатын, тұлғалардың белгісіз тобына арналған және жеке немесе заңды тұлғаға, тауарларға, тауар белгілеріне, жұмыстарға, көрсетілетін қызметтерге қызығушылықты қалыптастыруға немесе қолдауға және оларды іске асыруға ықпал етуге арналған ақпарат («Жарнама туралы» Заңның 3-бабы)

Сыртқы (көрнекі) жарнама - сыртқы (көрнекі) жарнама объектілерінде орналастырылған және елді мекендердегі үй-жайлардан тыс ашық кеңістікте, жалпыға ортақ пайдаланылатын автомобиль жолдарының бөлінген белдеуінде, елді мекендерден тыс және жалпыға ортақ пайдаланылатын автомобиль жолдарының бөлінген белдеуінен тыс ашық кеңістікте визуалды қабылдауға қолжетімді жарнама;

Сыртқы (көрнекі) жарнаманы орналастырғаны үшін төлем

Сыртқы (көрнекі) жарнамаға жатпайтыны

Төлем мөлшерлемелері

Есептеу, төлеу тәртібі және төлеу мерзімдері

Сыртқы (көрнекі) жарнаманы орналастырғаны үшін төлем

Салық кодексiнiң 603-бабына сәйкес Салық елдi мекендердегi ашық кеңiстiктегi және жалпыға ортақ пайдаланылатын автомобиль жолдарының бөлiнген белдеуiндегi жарнама құрылыстарында, жылжымалы және жылжымайтын объектiлерде орналастырылатын сыртқы (көрнекi) жарнамаға есептеледi.

Сыртқы (көрнекі) жарнаманы орналастыру плакаттар, транспаранттар, жалаулар, стендтер, жарық таблолары, билбордтар, стелалар, сілтемелер, афишалар түрінде және жарнама құрылыстарында, жылжымалы және жылжымайтын объектілерде жарнамалық бейнелер мен жазбаларды бейнелеу мен түсірудің өзге де тәсілдерімен жүзеге асырылады.

Тиісті хабарлама жіберілмеген жағдайда, сыртқы (көрнекі) жарнаманы нақты орналастыру төлемақы сомасын өндіріп алу және бюджетке енгізу үшін негіз болып табылады.

Жергілікті атқарушы органдар ай сайын, есепті айдан кейінгі айдың 15-күнінен кешіктірілмейтін мерзімде сыртқы (көрнекі) жарнама орналастырылған жердегі салық органдарына төлемақы төлеушілер, төлемақы сомалары, сыртқы (көрнекі) жарнаманың орналастырылу кезеңі мен орны, хабарламаның жіберілгені (жіберілмегені) туралы мәліметтерді уәкілетті орган белгілеген нысан бойынша ұсынады.

 Сыртқы (көрнекі) жарнаманы орналастыратын тұлғалар төлемақы төлеушілер болып табылады.

Сыртқы (көрнекі) жарнамаға жатпайтыны

«Жарнама туралы» Заңның 11-бабының 1-тармағына сәйкес сыртқы (көрнекі) жарнамаға:

1) маңдайша;
2) жұмыс режимі туралы ақпарат;
3) арнайы бөлінген орындарда орналастырылатын мәдени, спорттық және спорттық-бұқаралық іс-шаралардың афишалары;
4) техникалық қызмет көрсету құралдары мен көлік құралдарын дараландыру;
5) автожанармай құю станцияларына кіреберісте орналастырылатын мұнай өнімдерінің түрлері, мұнай өнімдерінің бағасы, сатушының атауы мен логотипі туралы ақпарат;
6) мәдени құндылықтар туралы және (немесе) тарихи-мәдени мұра объектілері туралы, оның ішінде тарих пен мәдениет ескерткiштерi туралы ақпарат (мәліметтер);
7) айырбастау пункттерінің жанында орналастырылатын қолма-қол шетел валютасын теңгеге сатып алу және (немесе) сату бағамдары туралы мәліметтерді қамтитын ақпарат;
8) мынадай сипаттағы сыртқы визуалды қабылдау үшін сөрелер мен терезелердің ішкі безендірілуі:

• үй-жайлардың ішінде орналастырылатын тауар өнімі;
• көрсетілетін қызметтердің түрлері;
• дараландыру құралдары;
• сәндік және мерекелік безендіру жатпайды.

Төлемақы мөлшерлемелері

Төлемақы ставкалары, ҚР Салық кодексінің 605-бабында көрсетілгендей, республикалық бюджет туралы заңда белгіленген және сыртқы (көрнекі) жарнаманы орналастыру жүзеге асырылатын тиісті күнтізбелік айдың бірінші күніне қолданыста болатын АЕК-тің еселенген мөлшерінде айқындалады.

Халықаралық және республикалық маңызы бар жалпыға ортақ пайдаланылатын автомобиль жолдарының бөлінген белдеуінде орналастырылатын сыртқы (көрнекі) жарнама жағының ауданы үш шаршы метрге дейін болатын сыртқы (көрнекі) жарнаманы орналастырғаны үшін базалық ай сайынғы төлемақы мөлшерлемелері 3-8 АЕК-тен құрайды.

Сыртқы (көрнекі) жарнаманы осындай жарнаманы орналастыру жағының алаңымен үш және одан да көп шаршы метр орналастырған кезде төлемақының базалық ай сайынғы мөлшерлемелері орналастырылатын сыртқы (көрнекі) жарнама жағының алаңының үш шаршы метрге қатысты ұлғаюына барабар арттырылады.

Есептеу, төлеу тәртібі және төлеу мерзімдері

Салық кодексінің 606-бабы негізінде - төлемақы мөлшері төлемақы мөлшерлемелері және сыртқы (көрнекі) жарнаманы орналастырудың:

1) хабарламада көрсетілген;

2) сыртқы (көрнекі) жарнама хабарлама жіберілмей орналастырылған жағдайда, республикалық маңызы бар қаланың, астананың, облыстық маңызы бар қаланың және ауданның жергілікті атқарушы органы белгілеген нақты мерзімі негізге алына отырып есептеледі.

Сыртқы (көрнекі) жарнаманы күнтізбелік бір айдан кем мерзімге орналастырған кезде төлемақы мөлшері күнтізбелік бір ай үшін айқындалады.

Бюджетке енгiзiлуге тиiс төлемақы сомасы ағымдағы айдың 25-iнен кешiктiрiлмейтiн мерзiмде ай сайын төленедi.

Төлемақы сомасы сыртқы (көрнекі) жарнаманы орналастыру орны бойынша бюджетке төленеді.