ҚР Азаматтық кодексінің 167-бабына сәйкес - Бiр адамның (сенiм бiлдiрушiнiң) өз атынан өкiлдiк ету үшiн екiншi адамға (сенiм бiлдiрген) берген жазбаша уәкiлдiгi сенiмхат деп танылады.

Жалпы ережелер

Сенімхат мерзімі

Сенімхат мерзімін тоқтату

Нотариаттық сенімхатты онлайн ресімдеу

Жалпы ережелер

Егер заңнама актiлерiнде өзгеше белгiленбесе, мүлiктi басқаруға және нотариаттық куәландыруды талап ететiн мәмiлелердi жасауға берiлген сенiмхат нотариалды куәландырылуға тиiс.

Заңды тұлғаның атынан сенімхат оның басшысының немесе құрылтай құжаттарында осыған уәкілеттік берілген өзге тұлғаның қолы қойылып беріледі және егер осы тұлғаның Қазақстан Республикасының заңнамасына сәйкес мөрі болуға тиіс болса, осы ұйымның мөрімен бекітіледі.

Мемлекеттік органның, коммерциялық және коммерциялық емес ұйымның атынан ақшаны және басқа да мүліктік құндылықтарды алуға немесе беруге сенімхатқа осы ұйымның бас (аға) бухгалтері де қол қоюға тиіс.

Банкте операциялар жасауға сенімхаттарды және сауда саласында мәмілелер жасауға сенімхаттарды беру тәртібі мен нысаны арнайы ережелермен айқындалуы мүмкін.

Сенімхат нысанының Д-1 нысаны түрінде белгіленген үлгісі бар. Толтыру жөніндегі нұсқаулық Қаржы министрлігінің 20.12.2012 жылғы № 562 бұйрығының № 6 қосымшасында көрсетілген.

Сенімхаттың негізгі тармақтары:

сенімхат беретін ұйым туралы мәліметтер:

  • атауы, кодтары және т.б.;
  • мәміле объектісін алу талап етілетін орын туралы деректер;
  • тауарды алуға сенімхаттың уақытша қолданылу мерзімі;
  • сенім білдірілген адамның паспорттық деректері: тегі, аты, әкесінің аты және т.б.;
  • мәміле объектісі туралы ақпарат: атауы және саны.

Сенімхат мерзімі

1. Сенімхат үш жылдан аспайтын мерзімге берілуі мүмкін, Егер сенімхатта неғұрлым ұзақ мерзім көрсетілсе, ол үш жыл бойы, ал егер онда қолданылу мерзімі көрсетілмесе - берілген күннен бастап бір жыл ішінде жарамды болады.

2. Берілген күні көрсетілмеген сенімхат маңызсыз болып табылады.

Сенімхат мерзімін тоқтату

1. Сенімхаттың қолданылуы:

1) сенімхат мерзімінің өтуі;

2) сенiмхатта көзделген әрекеттердiң жүзеге асуы;

3) сенiмхатты берушi адамның оның күшiн жоюы;

4) сенiмхат берiлген адамның одан бас тартуы;

5) өз атынан сенiмхат берген заңды тұлғаның тоқтатылуы;

6) атына сенiмхат берiлген заңды тұлғаның таратылуы;

7) сенiмхат берген адамның қайтыс болуы (оның ішінде қайтыс болған деп жариялануы), оның әрекет қабiлеттiгi жоқ, әрекет қабiлеттiгi шектеулi немесе хабар-ошарсыз кеттi деп танылуы;

8) сенiмхат берiлген азаматтың қайтыс болуы (оның ішінде қайтыс болған деп жариялануы), оның әрекет қабiлеттiгi жоқ, әрекет қабiлеттiгi шектеулi немесе хабар-ошарсыз кеттi деп танылуы салдарынан тоқтатылады.

2. Сенiмхатты берген адам сенiмхаттың немесе сенiмхатты ауыстырудың күшiн кез келген уақытта жоя алады, ал сенiмхат берiлген адам одан бас тарта алады. Бұл құқықтан бас тарту туралы келiсiм маңызсыз болады.

Нотариаттық сенімхатты онлайн ресімдеу

Цифрлық сенімхат клиенттің нотариуспен бейнебайланысы арқылы онлайн режимінде ресімделеді.

Аталған қызметті кез келген нотариус жүгінген кезде еркін көрсете алады.

Цифрлық сенімхатты барлық мемлекеттік инстанцияларда немесе талап ету орны бойынша қағаз аналогпен тең түрде көрсетуге болады.

Бұл ретте қауіпсіздікті қамтамасыз ету мақсатында eGov Mobile қосымшасында авторлану кезінде де, өтінімге қол қою кезінде де пайдаланушының биометриялық деректерін қолдана отырып, ЭЦҚ пайдаланылады.

Цифрлық сенімхатты ресімдеу үшін:

  • eGov Mobile қосымшасында авторлану;
  • ЭЦҚ көмегімен өтінімді толтыру және оған қол қою;
  • жеке басын растауға арналған қосымшадан нотариусқа бейне қоңырау шалуды жүзеге асыру;
  • белгіленген тариф бойынша нотариустың қызметіне ақы төлеу;
  • «Сандық құжаттар» бөлімінде цифрлық сенімхат алу қажет.

 

Возврат к списку