Төлем тапсырмасы - бұл ақша жөнелтушінің банкке төлем тапсырмасында көрсетілген сомада және деректемелерге сәйкес бенефициардың пайдасына қолма-қол ақшасыз төлем және (немесе) ақша аударымы туралы нұсқауы. (Қазақстан Республикасының аумағында қолма-қол ақшасыз төлемдерді және (немесе) ақша аударымдарын жүзеге асыру қағидаларының 15-тармағы)

Қазақстан Республикасының аумағында бенефициардың пайдасына Қазақстан Республикасының ұлттық валютасында қолма-қол ақшасыз төлемді және (немесе) ақша аударымын жүзеге асыру үшін ақша жөнелтуші банкке Қазақстан Республикасының аумағында қолма-қол ақшасыз төлемдерді және (немесе) ақша аударымдарын жүзеге асыру қағидаларына 1-қосымшаға сәйкес нысан бойынша төлем тапсырмасын ұсынады.

Ақша жөнелтуші бюджетке төлемдерді төлеу үшін Қағидаларға 2-қосымшаға сәйкес нысан бойынша бюджетке төлемдерді төлеуге төлем тапсырмасын ұсынады.

Ақша жөнелтушінің бюджетке төлемдер төлеуге Қағидаларға 1-қосымшаға сәйкес нысан бойынша төлем тапсырмасын ұсынуына жол беріледі.

«Төлемнің мақсаты» деген бағанда ақша жөнелтуші төлемнің мақсатын, оның негізінде қолма-қол ақшасыз төлем және (немесе) ақша аударымы жүзеге асырылатын құжаттың атауын, нөмірі мен күнін (ол болған кезде) және Қағидаларда көзделген өзге де деректемелерді көрсетеді, сондай-ақ «төлем мақсатының коды» деген бағанда төлемнің кодтық белгісі көрсетіледі.

Бюджетке төлемдерді төлеу кезінде төлем тапсырмасында бюджеттік сыныптама кодының цифрлық белгісі көрсетіледі. Төлем тапсырмасында бюджеттік сыныптама кодының дұрыс көрсетілуін жөнелтуші қамтамасыз етеді.

Заңды тұлға бюджетке төленетін төлемдерді, сондай-ақ міндетті зейнетақы жарналарын, жұмыс берушінің міндетті зейнетақы жарналарын, міндетті кәсіптік зейнетақы жарналарын және Мемлекеттік әлеуметтік сақтандыру қорына әлеуметтік аударымдарды, (немесе) өзінің оқшауланған бөлімшесі үшін әлеуметтік медициналық сақтандыру қорына жарналар «төлемнің мақсаты» бағанында мынадай реттілікпен БСН және міндеттемелері бойынша төлем жүзеге асырылатын заңды тұлғаның оқшауланған бөлімшесінің атауы, төлемнің мақсаты көрсетіледі.

Міндетті зейнетақы жарналарын, жұмыс берушінің міндетті зейнетақы жарналарын, міндетті кәсіптік зейнетақы жарналарын немесе әлеуметтік аударымдарды Мемлекеттік әлеуметтік сақтандыру қорына, аударымдарды және (немесе) жарналарды әлеуметтік медициналық сақтандыру қорына төлеу үшін қолма-қол ақшасыз төлемдерді және (немесе) ақша аударымдарын жүзеге асыру кезінде жөнелтуші төлем тапсырмасымен бір уақытта банкке көрсетілген жарналар және (немесе) аударымдар төленетін адамдардың тізімін ұсынады.

Төлем тапсырмасы немесе ақшаны аударуға арналған өтініш банкке оларда көрсетілген жазылу күнінен бастап күнтізбелік он күн ішінде ұсынылады. Ақша жөнелтуші Қазақстан Республикасының аумағында ұлттық валютада қолма-қол ақшасыз төлемді және (немесе) ақша аударымын жүзеге асыру үшін банктік шот болған кезде банкке Қағидаларға 1-қосымшаға сәйкес нысан бойынша төлем тапсырмасын ұсынады. Қызмет көрсететiн банкпен келісім бойынша ақша жөнелтушi төлем тапсырмасында немесе ақша аударуға арналған өтініште валюталау күнiн көрсетеді.

Қағидалардың 1-параграфына сәйкес шетел валютасында ақша аударуға арналған өтінішті қоспағанда, қағаз тасымалдағыштағы және (немесе) электрондық нысандағы төлем тапсырмасында, төлем талабында, инкассолық өкімде, төлем ордерінде, төлем хабарламасында және ақша аударуға арналған өтініште (бұдан әрі – төлем құжаты) мынадай деректемелер қамтылады:

1) төлем құжатының атауы;
2) төлем құжатының нөмірі, оның цифрлармен көрсетіліп жазылған күні, айы, жылы.
Қағаз тасымалдағышта берілген төлем құжаттарында айды жазумен белгілеуге жол беріледі;
3) заңды тұлғаның, филиалдың, өкілдіктің, аумақтық оқшауланған өкілдіктің (бұдан әрі – оқшауланған бөлімшелер), сондай-ақ нақты төлеушінің және (немесе) нақты (түпкілікті) бенефициардың ұйымдық-құқықтық нысанын қоса алғанда, толық немесе қысқартылған атауы;
4) дара кәсіпкердің толық немесе қысқартылған атауы, ақша жөнелтушінің және бенефициардың ұйымдық-құқықтық нысаны (бар болса);
5) жеке кәсіпкерлік түріндегі қызметті жүзеге асыратын дара кәсіпкердің толық немесе қысқартылған атауы, ақша жөнелтушінің және бенефициардың егі, аты, әкесінің аты (ол бар болса);
6) ақша жөнелтуші жеке тұлғаның және бенефициардың тегі, аты, әкесінің аты (ол бар болса);
7) ақша жөнелтушінің және бенефициардың жеке сәйкестендіру коды.
Жеке тұлғада жеке сәйкестендіру коды болмаған жағдайда, оның жеке басын куәландыратын құжаттың деректері, сондай-ақ пошталық мекенжайы (ел, қала, көше, үйдің және пәтердің нөмірі) көрсетіледі.
Аты мен әкесінің атын (ол болған кезде) аты-жөнінің бас әріптерімен көрсетуге жол беріледі;
8) ақша жөнелтуші банктің және бенефициар банктің ұйымдық-құқықтық нысанын қоса алғанда, толық немесе қысқарған атауы, олардың банктік сәйкестендіру кодтары;
9) төлем белгілеу, сондай-ақ оның код белгіленімі.
Төлем құжаттарындағы төлем белгілеудің код белгіленімінің дұрыс көрсетілуін бастамашы қамтамасыз етеді;
10) цифрлармен және жазумен көрсетілген төлем сомасы. Жазумен берілген сомадағы тиындар цифрлармен көрсетіледі.
Егер цифрлармен көрсетілген төлем сомасы тиын көрсетілмей теңгемен берілсе, онда тиын жазумен берілген сомада көрсетілмейді;
11) Қағидаларда көзделген, сондай-ақ ақша жөнелтуші немесе бенефициар шетелдіктер және (немесе) азаматтығы жоқ адамдар болып табылған жағдайларда жеке сәйкестендіру нөмірін (бұдан әрі – ЖСН) (бизнес сәйкестендіру нөмірін (бұдан әрі – БСН) көрсету талап етілмейтін төлем құжаттарын қоспағанда, ақша жөнелтушінің, бенефициардың, сондай-ақ нақты төлеушінің және (немесе) нақты (түпкілікті) бенефициардың ЖСН немесе БСН.
Ақша жөнелтушінің немесе бенефициардың ЖСН (БСН) көрсету талап етілмейтін төлем құжаттарында олардың мекенжайы (жеке және заңды тұлғалар үшін) не жеке басын куәландыратын құжаттың (жеке тұлға үшін) деректемелері көрсетіледі;
12) ақша жөнелтушінің коды (Ажк) және бенефициардың коды (Бек);
13) бастамашының немесе оның уәкілетті адамдарының қойылған қолдары.

Қағидалардың 93-тармағы негізенде төлем тапсырмасы ақша жөнелтушінің банкі:

1) ақша жөнелтушінің банкі жөнелтушiге орындау туралы хабарлама немесе төлем тапсырмасына ақы төлеу ретiнде қолма-қол ақшаны қабылдау туралы хабарлама жiберген;

2) жөнелтуші нұсқау алған күннен кейінгі келесі бір операциялық күннің ішінде ақша жөнелтушінің банкісінен төлем тапсырмасын орындауға қабылдау туралы немесе орындаудан бас тарту туралы хабарлама алмаған (әдеттегі тәртіп бойынша) талаптарының бiреуi болған кезде;

3) ақша жөнелтуші банк пен жөнелтуші арасындағы шартта көзделген өзге де жағдайларда орындауға қабылданды деп саналады.