Жүк тасымалы - бұл қандай да бір көлікпен жүкті тасымалдау жөніндегі қызмет, кешенді жұмыс.

Жүк тасымалдауды жүзеге асыру кезінде жүк жөнелтуші Автомобиль көлігімен жүктерді тасымалдау қағидаларына сәйкес ТКЖ жазып беруге міндетті.

Автомобиль көлігімен жүктерді тасымалдау қағидаларына сәйкес автомобиль тасымалдарын жүзеге асыру кезінде ТКЖ және жол парағы ресімделеді.

ТКЖ ресiмдеу тәртiбi Автомобиль көлiгiмен жүк тасымалдау қағидаларымен белгiленген.

Қағидаларға сәйкес жүктерді тасымалдау тауар-көлік жүкқұжаттарымен ресімделеді, ал үйіп (бос) тасымалданатын жүктердің кейбір түрлерін тасымалдау жағдайларында өлшеу актісімен немесе таразыға тарту актісімен ресімделуі мүмкін.

Уақыттық тариф бойынша ақы төлей отырып, автокөлік құралдарын пайдалану (автокөлік құралының жұмысына ақы төлеу бір жұмыс күні (ауысым) ішінде сағаттық есептен жүргізіледі) жүргізушінің түскі үзіліс уақытын шегере отырып, автокөлік құралының жүкжөнелтушінің (жүк алушының) қарамағында болған уақыты мен жүрісі көрсетілген жол парағындағы жазбалармен ресімделеді.

Жүк жөнелтуші тасымалдаушыға тасымалдауға ұсынылған жүкке негізгі тасымалдау құжаты болып табылатын және ол бойынша жүк жөнелтуші осы жүкті есептен шығаратын және оны жүк алушы кіріске алатын төрт данада жасалатын тауар-көлік жүкқұжатын ұсынады.

Жүктерді автомобильмен тасымалдауға арналған тауар-көлік жүкқұжатын жүк жөнелтуші әрбір жүк алушының атына төрт данада мынадай деректемелерді толтыра отырып жасайды: жүк алушының атауы, жүктің атауы, тасымалданатын жүктің саны, салмағы, салмағын айқындау тәсілі (өлшеу, трафареті, стандарты, өлшемі бойынша), буып-түю түрі, тиеу және түсіру тәсілі, автокөлік құралын тиеуге беру уақыты және тиеудің аяқталу уақыты, бос тұрып қалу уақыты.

Тауар-көлік жүкқұжатында көрсетілген мәліметтердің дұрыс еместігі, дәл еместігі немесе толық еместігі салдарынан туындаған зиянды жүк жөнелтуші өтейді.

Жүктерді жүк жөнелтушіден тасымалдауға қабылдау тауар-көлік жүкқұжатының барлық даналарында тасымалдаушының қолымен куәландырылады.

Үйіп, бос, құйып және контейнерлермен тасымалданатын жүктерді жүк жөнелтуші тапсырған және тасымалдаушы қабылдаған кезде бұл жүктердің салмағы анықталады және тауар-көлік жүкқұжатында көрсетіледі.

Тауар-көлік жүкқұжатының барлық даналарында қағаз тасығышта ресімделген жағдайда, жүк жөнелтуші автокөлік құралдың келу, кету және тұру уақытын қояды, сондай-ақ тиеу тәсілін, жүктің салмағын, жүк орындарының санын, тасымалдаушы орындайтын қызметтердің түрлерін көрсетеді және тауар-көлік жүкқұжаттарын қолмен, мөрмен немесе мөртабанмен растайды.

Осылайша, тауарды көлік құралына тиеу кезінде жүк жөнелтуші ТКЖ жазып беруі тиіс, ал жол парағын тасымалдаушының өзі ресімдейді.

Бухгалтерлік есеп және қаржылық есептілік туралы ҚР Заңының 7-бабына сәйкес есепте барлық оқиғалар мен операциялар операция жасалған сәтте жасалған бастапқы есепке алу құжаттарының негізінде көрсетіледі. Бастапқы есепке алу құжаттарының нысандарын уәкілетті орган бекітті.

Бастапқы құжаттар операция немесе оқиға жасалған кезде не олар аяқталғаннан кейін тікелей жасалуға тиіс.

Тауарларды өткізу кезінде Бухгалтерлік есепті жүргізу қағидаларына сәйкес 3-2-нысан бойынша Қорларды сыртқа босатуға арналған жүкқұжат ресімделеді, оның нысаны № 562 бұйрықпен бекітілген.

Қазақстан Республикасы Қаржы министрлігі Мемлекеттік кірістер комитетінің электрондық шот-фактуралар ақпараттық жүйесінде тауарларға ілеспе жүкқұжат ресімделген жағдайда, қорларды сыртқа босатуға жүкқұжат жасау (ресімдеу) талап етілмейді.

Бақылау-касса машинасын пайдалана отырып бөлшек сауда кезінде қорларды босатуға арналған жүкқұжаттың орнына бақылау-касса машинасының чегі не тауарлық чек (бақылау-касса машинасының техникалық ақауы болған немесе электр энергиясы болмаған жағдайда) беріледі.

Бухгалтерлік есепті жүргізу қағидаларына сәйкес жұмыстар мен қызметтерді орындау кезінде нысаны № 562 бұйрықпен бекітілген Орындалған жұмыстар актісі (Р-1 нысаны) ресімделеді.

ЭШФ ҚР СК 412-бабына сәйкес жазып беріледі.

ҚР ҰЖ 03-2019 экономикалық қызмет түрлерінің жалпы жіктеуіші (ЭҚЖЖ)

Кәсіпорынның негізгі экономикалық қызмет түрін айқындау әдістемесі Қазақстан Республикасы Ұлттық экономика министрлігі Статистика комитеті төрағасының 2020 жылғы 7 қыркүйектегі № 35 бұйрығы.