Әрекет етпейтін салық төлеушiлерге әрекет етпейтін заңды тұлғалар мен дара кәсiпкерлер жатады.

Салық кодексінің 91-бабына сәйкес салық міндеттемелері уақтылы орындалмаған жағдайда салық төлеушілер әрекет етпейтін деп танылған салық төлеушілердің тізіміне кіре алады.

Осы Кодексте белгіленген ұсыну мерзімінен кейін бір жыл өткен соң салықтық кезең үшін:

1) корпоративтік табыс салығы бойынша декларацияны (заңды тұлғалар үшін), жеке табыс салығы бойынша декларацияны (жеке кәсіпкерлер үшін);

2) егер көрсетілген салықтық кезеңнен кейінгі үш салықтық кезең үшін заңды тұлға да, ДК де ойын бизнесі салығы бойынша, тіркелген салық бойынша декларация ұсынбаған жағдайда, мұндай декларацияны;

3) егер көрсетілген салықтық кезеңнен кейінгі екі салықтық кезең үшін заңды тұлға да, ДК де жеңілдетілген декларация ұсынбаған жағдайда, мұндай декларацияны ұсынбаған резидент-заңды тұлға, Қазақстан Республикасында қызметін тұрақты мекеме арқылы жүзеге асыратын бейрезидент-заңды тұлға, сондай-ақ бейрезидент-заңды тұлғаның құрылымдық бөлімшесі әрекет етпейтін заңды тұлға болып танылады.

Салық органдары салық төлеушілерді әрекет етпейтін деп тану туралы бұйрықты жыл сайын, 30 сәуірден кешіктірмей шығарады, олар туралы мәліметтер осындай бұйрық шығарылған күннен кешіктірілмей, уәкілетті органның интернет-ресурсында жарияланады.

Әрекет етпейтін деп танылған салық төлеушілер туралы мәліметтер:

1) салық төлеуші салықтық есептілікті ұсыну бойынша салықтық міндеттемені орындағаннан;

2) салықтық есептілікті осы Кодексте белгіленген мерзімде ұсынбағаны үшін салық төлеушіге Қазақстан Республикасының заңнамасына сәйкес айыппұлдар қолданылған жағдайда, олар төленгеннен кейін бес жұмыс күні ішінде қабылданған салық органының бұйрығына сәйкес уәкілетті органның интернет-ресурсынан алып тасталады.

Әрекет етпейтін деп танылған салық төлеушілер туралы мәліметтер салық органының тиісті бұйрығы қабылданған күннен кейінгі бір жұмыс күнінен кешіктірілмей, уәкілетті органның интернет-ресурсынан алып тасталады.

Салық төлеуші Заңды тұлғалардың мемлекеттік тiзiлiмінен алынған немесе дара кәсіпкер ретінде тіркеу есебінен шығарылған жағдайда, мұндай салық төлеушілер бір мезгілде әрекет етпейтін салық төлеушілер тiзiлiмінен алып тасталады.

Салық төлеуші kgd.gov.kz сайтындағы «Электрондық сервистер» мәзіріндегі «Сенімсіз төлеушілерді іздеу» бөліміндегі әрекет етпейтін тұлғалардың тізімінде бар-жоғын тексере алады. Бұдан басқа, әрекет етпейтін салық төлеушілерді pk.uchet.kz сайтынан да тексеруге болады.

Егер сенімсіз төлеушілер тізіміне кірген болса

Егер салық төлеуші осы тізімде болса, онда оған:

1) салық есептілігін ұсыну және есептелген салықтарды төлеу жөніндегі салық міндеттемелерін орындау;

2) «Әкімшілік құқық бұзушылық туралы» Қазақстан Республикасы Кодексінің 272-бабы бойынша әкімшілік материал жасау үшін орналасқан жері бойынша МКБ келу қажет.

Сенімсіз төлеушілер тізімінен шығару үшін жалпы мерзім - 5 жұмыс күнінен кешіктірмей.

5 күн өткеннен кейін сайттан алып тастауды «Сенімсіз төлеушілерді іздеу» бөлімінде тексеруге болады.

Әрекет етпейтін салық төлеушілер неден қорқуы керек?

Әрекет етпейтін салық төлеушілер тізімінде болу:

• ҚҚС бойынша есептен шығаруға;
• контрагенттердің компания қызметіне күмәндануына;
• банктерде шот ашудың және кредиттерді ресімдеудің/алудың мүмкін еместігіне әкеп соқтыруы мүмкін.