ҚР Еңбек кодексі 87-бабына сәйкес - Жұмыскерлерге жыл сайынғы ақы төленетін еңбек демалысының мынадай түрлері беріледі:

1) жыл сайынғы негізгі ақы төленетін еңбек демалысы;

2) жыл сайынғы ақы төленетін қосымша еңбек демалысы.

Жыл сайынғы ақы төленетін қосымша еңбек демалыстары

1. Мыналарға:

1) ауыр жұмыстарда, еңбек жағдайлары зиянды және (немесе) қауіпті жұмыстарда істейтін жұмыскерлерге Өндірістердің, цехтардың, кәсіптер мен лауазымдардың тізіміне, ауыр жұмыстардың, еңбек жағдайлары зиянды және (немесе) қауіпті жұмыстардың тізбесіне сәйкес ұзақтығы кемінде күнтізбелік алты күн болатын жыл сайынғы ақы төленетін қосымша еңбек демалыстары беріледі.

Ауыр, зиянды және (немесе) қауіпті жағдайлардағы еңбегі өндірістік объектілерді еңбек жағдайлары бойынша аттестаттау нәтижелерімен расталған жұмыскерлерге жыл сайынғы ақы төленетін қосымша еңбек демалыстары беріледі.

Жұмыс беруші өндірістік объектілерді еңбек жағдайлары бойынша, сондай-ақ аттестаттауға жатпайтын жұмыс орындары бойынша аттестаттауды өткізбеген жағдайда, жыл сайынғы ақы төленетін қосымша еңбек демалыстары Өндірістердің, цехтардың, кәсіптер мен лауазымдардың тізіміне, ауыр жұмыстардың, еңбек жағдайлары зиянды және (немесе) қауіпті жұмыстардың тізбесіне сәйкес толық көлемде беріледі;

2) бірінші және екінші топтардағы мүгедектігі бар адамдарға ұзақтығы кемінде күнтізбелік алты күн болатын жыл сайынғы ақы төленетін қосымша еңбек демалыстары беріледі.

Жіберуші тараптың жұмыскерлеріне жыл сайынғы ақы төленетін қосымша еңбек демалыстары қабылдаушы тараптың өндірістік объектілерін еңбек жағдайлары бойынша аттестаттау нәтижелерінің негізінде беріледі.

2. Жұмыскерлердің өзге санаттарына жыл сайынғы қосымша демалыс беру және оның ұзақтығы Қазақстан Республикасының заңдарында белгіленуі мүмкін.

3. Еңбек, ұжымдық шарттарда жұмыскерлерге үздіксіз ұзақ жұмысы, маңызды, күрделі, жедел жұмыстарды, сондай-ақ өзге де сипаттағы жұмыстарды орындағаны үшін көтермелеу сипатындағы жыл сайынғы ақы төленетін қосымша демалыстар белгіленуі мүмкін.

Қосымша демалыс Жұмыскерлерге негiзгi демалысымен бiрге берiледi, яғни демалыстың 2 түрi қосылады.

Жұмыскерлердің жоғарыда көрсетілген санаттарының денсаулығын нығайту және жұмысқа қабілеттілігін қалпына келтіру үшін неғұрлым ұзақ ақы төленетін еңбек демалысы болуы үшін жыл сайынғы ақы төленетін қосымша еңбек демалысы заңнамада белгіленген.

«Семей ядролық сынақ полигонында ядролық сынақтардың салдарынан зардап шеккен азаматтарды әлеуметтік қорғау туралы» ҚР Заңының 13-бабының 3-тармақшасына сәйкес 5, 6, 7, 8, 9-баптарда аталған аумақтарда тұратын халық:

Мына аймақтар бойынша төмендегiдей жыл сайын ақысы төленетiн қосымша демалыс алуға:

  • төтенше радиациялық қауiптi аймақ бойынша - 14 күнтізбелік күнi бар;

  • ең жоғары радиациялық қауiптi аймақ бойынша - 12 күнтізбелік күнi бар;

  • жоғары радиациялық қауiптi аймақ бойынша - 10 күнтізбелік күнi бар;

  • ең төмен радиациялық қауiптi аймақ бойынша - 7 күнтізбелік күнi бар;

  • жеңiлдiктi әлеуметтiк-экономикалық мәртебесi бар аумақ бойынша 5 күнтізбелік күнi бар демалыс алуға құқылы.

Оның ішінде тәуекел аймағының аумағы бойынша экологиялық төлемдер

Төтенше радиациялық қауіпті аймақ

Таралу аумағы

Қосымша еңбекақы мөлшері

Экологиялық қосымша демалыстың ұзақтығы

ҚР 1992 жылғы 18 желтоқсандағы № 1787-XII Заңының 5-бабына сәйкес төтенше радиациялық қауіпті аймаққа Шығыс Қазақстан облысының Абай ауданы, Сарыжал ауылдық округінің, Бесқарағай ауданы, Долон ауылдық округінің, таратылған Жаңасемей ауданының Сарыапан және Иса елдi мекендерiнiң аумақтары жатады.

2 АЕК

14 күнтізбелік күн

Ең жоғары радиациялық қауіпті аймақ

Таралу аумағы

Қосымша еңбекақы мөлшері

Экологиялық қосымша демалыстың ұзақтығы

ҚР 1992 жылғы 18 желтоқсандағы № 1787-XII Заңының 6-бабына сәйкес ең жоғары радиациялық қауіпті аймаққа Шығыс Қазақстан облысының Абай, Бесқарағай және таратылған Жаңасемей аудандарының, Семей қаласы Ақбұлақ, Абыралы, Алғабас, Айнабұлақ, Қараөлең және Таңат ауылдық округтерінің, Павлодар облысы Май ауданы Ақжар және Малдар ауылдық округтерінің елдi мекендерi жатады.

1,75 АЕК

12 күнтізбелік күн

Жоғары радиациялық қауіпті аймақ

Таралу аумағы

Қосымша еңбекақы мөлшері

Экологиялық қосымша демалыстың ұзақтығы

ҚР 1992 жылғы 18 желтоқсандағы № 1787-XII Заңының 7-бабына сәйкес бұл аймаққа Шығыс Қазақстан облысының Бородулиха, Жарма, Аягөз, Глубокое, Шемонайха, Ұлан аудандарының елдi мекендерi, Семей, Курчатов, Өскемен және Риддер қалалары; таратылған Қазыбек би ауданының аумағы шегінде Қарағанды облысының Қарқаралы ауданы, Павлодар облысының Май ауданы жатады.

1,5 АЕК

10 күнтізбелік күн

Ең төмен радиациялық қауіпті аймақ

Таралу аумағы

Қосымша еңбекақы мөлшері

Экологиялық қосымша демалыстың ұзақтығы

ҚР 1992 жылғы 18 желтоқсандағы № 1787-XII Заңының 8-бабына сәйкес ең төмен радиациялық қауіпті аймаққа Шығыс Қазақстан облысының Yржар, таратылған Таскескен, Көкпектi, Ақсуат, Зырян, Зайсан және Тарбағатай аудандарының; Қарағанды облысының таратылған Қазыбек би ауданының аумағын қоспағанда, Қарқаралы ауданының; Павлодар облысының Лебяжi ауданының елдi мекендерi жатады.

1,25 АЕК

7 күнтізбелік күн

Жеңілдікті әлеуметтік-экономикалық мәртебесі бар аумақ

Таралу аумағы

Қосымша еңбекақы мөлшері

Экологиялық қосымша демалыстың ұзақтығы

ҚР 1992 жылғы 18 желтоқсандағы № 1787-XII Заңының 9-бабына сәйкес бұл аймаққа Павлодар облысының Баянауыл ауданы жатады.

1 АЕК

5 күнтізбелік күн

ҚР 1992 жылғы 18 желтоқсандағы № 1787-XII Заңының 13-бабында баяндалғанның негізінде көрсетілген ҚР Заңының 5, 6, 7, 8, 9-баптарында көрсетілген аумақтарда тұратын азаматтарға қосымша еңбекақы және экологиялық демалыс беріледі.

 

 


Возврат к списку