Консалтинг - бұл бағыттылығы мен ерекшелігіне қарамастан консультациялық қызметтер көрсету.

Консалтингтік қызметтер ұғымы ҚР салық заңнамасында қарастырылмайды. Консалтинг сөзі ағылшын тіліндегі consulting-тен келген.

Консалтинг (консультация беру) – қаржылық, коммерциялық, заң, технологиялық, техникалық, сараптамалық қызмет саласындағы мәселелердің кең ауқымы бойынша басшыларға, басқару аппаратына, басқарушыларға консультация беру жөніндегі қызмет. Консалтингтің мақсаты – басқару жүйесіне (менеджментке) мәлімделген мақсаттарға қол жеткізуге көмектесу. Басқаша айтқанда, консалтинг - бұл қандай да бір проблеманы шешу үшін сыртқы консультанттар көрсететін қаржы, заң, технологиялық, техникалық, сараптамалық қызмет саласындағы мәселелердің кең ауқымы бойынша басқарушылық консультация беру.

Осылайша, салық салу мақсатында консалтингтік көрсетілетін қызметтер консультациялық қызметтер ретінде қарастырылады.

ҚР Салық кодексінің 1-бабы 1-тармағының 36-тармақшасына сәйкес:
36) консультациялық көрсетілетін қызметтер – басқарушылық, экономикалық, қаржылық, инвестициялық мәселелерді, оның ішінде стратегиялық жоспарлау, кәсіпкерлік қызметті ұйымдастыру мен жүзеге асыру, персоналды басқару мәселелерін шешу мақсатында тұлғаның проблемаларын және (немесе) мүмкіндіктерін айқындауды және (немесе) бағалауды қоса алғанда, түсіндірмелер, ұсынымдар, кеңестер және өзге де нысандағы консультациялар беру бойынша көрсетілетін қызметтер;

ҚР СК 683-бабына сәйкес шағын бизнес субъектілеріне арналған арнаулы салық режимін мынадай талаптарға сәйкес келетін:

1) арнаулы салық режимi үшiн салықтық кезеңдегі жұмыскерлердiң орташа тізімдік саны:

• оңайлатылған декларация негізінде - 30 адамнан;
• тіркелген шегерімді пайдаланумен - 50 адамнан аспайтын;

2) арнаулы салық режимі үшін салықтық кезеңдегі кірісі:

• патент негізінде немесе арнаулы мобильді қосымша пайдаланылатын – республикалық бюджет туралы заңда белгіленген және тиісті қаржы жылының 1 қаңтарына қолданыста болатын АЕК-тің 3 528 еселенген мөлшерінен;
• оңайлатылған декларация негізінде – республикалық бюджет туралы заңда белгіленген және тиісті қаржы жылының 1 қаңтарына қолданыста болатын АЕК-тің 24 038 еселенген мөлшерінен;
• тіркелген шегерімді пайдаланумен – республикалық бюджет туралы заңда белгіленген және тиісті қаржы жылының 1 қаңтарына қолданыста болатын АЕК-тің 144 184 еселенген мөлшерінен аспайтын;

Бұл ретте осы тармақшаның бірінші бөлігінің үшінші абзацында көрсетілген кіріске дара кәсіпкердің республикалық бюджет туралы заңда белгіленген және тиісті қаржы жылының 1 қаңтарына қолданыста болатын айлық есептік көрсеткіштің 70 048 еселенген мөлшері шегіндегі, үш құрамдасты интеграцияланған жүйені міндетті түрде қолдана отырып, қолма-қол ақшасыз есеп айырысулар арқылы алған кірістері қосылмайды.

3) мынадай қызмет түрлерін:

• консультациялық және (немесе) маркетингтік көрсетілетін қызметтерді жүзеге асырмайтын салық төлеушілер қолдануға құқылы;

Осылайша, консалтингтік компанияның арнайы салық режимін қолдануға құқығы жоқ, компания өз қызметін жалпыға бірдей белгіленген салық салу режимінде жүзеге асыруға тиіс.

ҚР ҰК 03-2019 экономикалық қызмет түрлерінің жалпы жіктеуіші (ЭҚЖЖ)

Кәсіпорынның негізгі экономикалық қызмет түрін айқындау әдістемесі Қазақстан Республикасы Ұлттық экономика министрлігі Статистика комитеті төрағасының 2020 жылғы 7 қыркүйектегі № 35 бұйрығы.