«Баланстан тыс шоттар» Шоттар жоспарының 9-бөліміне жатады.

Баланстан тыс шоттарда мемлекеттік мекемеде уақытша тұрған және оған тиесілі емес активтер есепке алынады. Баланстан тыс шоттарда ескерілген активтер баланста ескерілетін ұқсас активтер үшін белгіленген тәртіппен және мерзімде түгендеуге жатады.

Көрсетілген активтерді есепке алу үшін мынадай баланстан тыс шоттар қолданылады:

01-шот – «Жалға алынған активтер». Осы шотта мемлекеттік мекеме операциялық жалдау шарты бойынша қабылдаған активтер жалға алу шартында көзделген құн бойынша ескеріледі;

02-шот – «Жауапты сақтауға қабылданған немесе орталықтандырылған жабдықтау бойынша төленген қорлар». Осы шотта шарт бойынша ғылыми-зерттеу және конструкторлық жұмыстарды орындау үшін тапсырыс берушілерден алынған арнайы жабдықты қоса алғанда, мемлекеттік мекеме жауапты сақтауға қабылдаған қорлар, сондай-ақ орталықтандырылған жабдықтау бойынша төленген қорлар есепке алынады;

03-шот – «Қатаң есептілік бланкілері». Бұл шотта сақтауда тұрған және есеп беруге берілетін қатаң есептілік бланкілері (мемлекеттік мекемелердің фирмалық бланкілері, төленген тамақтану талондары, демалыс үйлеріне, санаторийлер мен туристік базаларға төленген жолдамалар, почта аударымдарына алынған хабарламалар, пошта маркалары мен мемлекеттік баж маркалары, еңбек кітапшаларының бланкілері) есепке алынады;

04-шот – «Төлем қабілеті жоқ дебиторлардың есептен шығарылған берешегі». Осы шотта «Оңалту және банкроттық туралы» 2014 жылғы 7 наурыздағы Қазақстан Республикасы Заңының 5-бабының 2-тармағында белгіленген тәртіппен өндіріп алуға үмітсіз деп танылған сәттен бастап бес жыл ішінде төлем қабілеті жоқ дебиторлардың берешегі, борышкерлердің мүліктік жағдайы өзгерген жағдайда оны өндіріп алу мүмкіндігін байқау үшін баланстан есептен шығару ескеріледі. Осы берешекті өтеу үшін алынған сомалар баланстық шотқа қалпына келтіріледі және мемлекеттік мекеменің тиісті бюджеттің кірісіне беру бойынша бюджет алдындағы міндеттемесі ретінде танылады;

05-шот – «Қайтарылмаған материалдық құндылықтар үшін оқушылар мен студенттердің берешегі». Бұл шотта талап қою мерзімі ішінде оқушылар мен студенттерге қайтарылмаған киім-кешек, іш киім, құрал-саймандар және басқа да құндылықтар үшін берешек есепке алынады;

06-шот – «Ауыспалы спорттық жүлделер мен кубоктар». Бұл шотта әр түрлi мемлекеттiк мекемелер тағайындаған және олардан жеңiмпаз командаларды марапаттау үшiн алынатын ауыспалы сыйлықтар, жалаулар, кубоктар есепке алынады. Жүлделер, тулар, кубоктар осы мемлекеттік мекемеде болған барлық кезең ішінде есепке алынады;

07-шот – «Жолдамалар». Бұл шотта қоғамдық, кәсіподақ және басқа ұйымдардан өтеусіз алынған жолдамалар есепке алынады. Жолдамалар кассада ақшалай құжаттармен бірге сақталуы тиіс;

08-шот – «Әскери техниканың оқу пәндері». Бұл шотта тирлердегі, спорттық атыс орындарындағы, оқу орындарының әскери пәндер кабинеттеріндегі жабдықтар мен заттардың барлық түрлері есепке алынады;

09-шот – «Мәдени мұра активтері». Бұл шотта тарихи ғимараттар мен монументтер, археологиялық қазба орындары, қорықтар мен табиғи қорғалатын аумақтар, сондай-ақ құндық бағалауға ұшырамайтын мәдени мұра объектілері ретінде танылған өнер туындылары есепке алынады;

10-шот – «Мемлекет меншігіне айналдырылған (түскен) мүлік». Осы шотта «Мемлекеттік мүлік туралы» 2011 жылғы 1 наурыздағы Қазақстан Республикасы Заңының 21-бабында көзделген жекелеген негіздер бойынша мемлекеттік мүліктің құрамына айналдырылған (түскен) мүлік есепке алынады;

11-шот – «Оқыту бойынша қызметшілердің берешегі». Осы шотта қаржы нарығын және қаржы ұйымдарын реттеу, бақылау мен қадағалау жөніндегі уәкілетті орган қызметшілерінің оқыту бойынша берешегі ескеріледі.