Мемлекеттік көрсетілетін қызмет - көрсетілетін қызметті алушылардың өтініш жасауы бойынша немесе өтініш жасауынсыз жүзеге асырылатын және олардың құқықтарын, бостандықтары мен заңды мүдделерін іске асыруға, оларға тиісті материалдық немесе материалдық емес игіліктер беруге бағытталған жекелеген мемлекеттік функцияларды іске асыру нысандарының бірі немесе олардың жиынтығы. (Мемлекеттік көрсетілетін қызметтер туралы Заңның 1-бабы)

Қазақстан Республикасы Қаржы министрлігінің Мемлекеттік кірістер комитеті салық төлеушілермен байланыстарды барынша азайту мақсатында, сондай-ақ салық төлеушілерге ыңғайлы болу үшін мемлекеттік қызметтер көрсету бойынша мүмкіндіктерді ұдайы кеңейтіп отырады.

Қазір үйден немесе кеңседен шықпай-ақ, онлайн режимінде мемлекеттік қызметтерді алуға болады, оның ішінде ең қажеттілері: салық есептілігін қабылдау, жеке кәсіпкерді тіркеу, салықты және бюджетке төленетін басқа да міндетті төлемдерді есепке алу және қайтару және т.б.

Барлық қызметтер мен сервистерді Салық төлеушінің кабинетінде электрондық цифрлық қолтаңба болған жағдайда электрондық үкіметтің веб-порталы арқылы алуға болады.  

Сонымен қатар, мемлекеттік кірістер органдарының ресми интернет-ресурсынан ғана емес, «e-Salyk mobile» мобильдік қосымшасы арқылы да өз қарыздарын білуге, қызметін тоқтата тұру, сондай-ақ ҚҚС төлеуші ретінде тіркелу туралы мәліметтерді алуға болады.

Мемлекеттік көрсетілетін қызметтер туралы Заңда 18-бабына сәйкес мемлекеттік қызметтерді мыналар көрсетеді:

1) көрсетілетін қызметті берушілер;

Көрсетілетін қызметті берушілердің мемлекеттік қызметтер көрсету талаптары мен тәртібі мемлекеттік қызметтер көрсету тәртібін айқындайтын заңға тәуелді нормативтік құқықтық актімен айқындалады.

Көрсетілетін қызметті алушы мемлекеттік қызмет көрсету тәртібін айқындайтын заңға тәуелді нормативтік құқықтық актіде көзделген тізбеге сәйкес құжаттардың топтамасын толық ұсынбаған және (немесе) қолданылу мерзімі өткен құжаттарды ұсынған жағдайларда, көрсетілетін қызметті беруші өтінішті қабылдаудан бас тартады.

2) Мемлекеттік корпорация арқылы;

Мемлекеттік корпорация арқылы көрсетілетін қызметті алушының өтініші мен құжаттарын көрсетілетін қызметті берушілерге қағаз жеткізгіште жіберуді көздейтін мемлекеттік қызметтер көрсету кезінде өтініштер мен құжаттарды қабылдау күні мемлекеттік қызмет көрсету тәртібін айқындайтын заңға тәуелді нормативтік құқықтық актіде белгіленген мемлекеттік қызмет көрсету мерзіміне кірмейді.

Мемлекеттік корпорацияның қызметкері көрсетілетін қызметті алушыда мемлекеттік қызмет көрсету тәртібін айқындайтын заңға тәуелді нормативтік құқықтық актіде көзделген тізбеге сәйкес құжаттардың толық топтамасы болған кезде оның өтінішін қабылдауға міндетті.

Көрсетілетін қызметті алушы мемлекеттік қызмет көрсету тәртібін айқындайтын заңға тәуелді нормативтік құқықтық актіде көзделген тізбеге сәйкес құжаттардың толық топтамасын, сондай-ақ қолданылу мерзімі өткен құжаттарды ұсынбаған жағдайда, Мемлекеттік корпорацияның қызметкері өтінішті қабылдаудан бас тартады.

Мемлекеттік корпорация арқылы мемлекеттік қызмет көрсету кезінде көрсетілетін қызметті алушының жеке басын сәйкестендіруді Мемлекеттік корпорацияның қызметкерлері жүзеге асырады.

Мемлекеттік корпорация арқылы мемлекеттік қызметтер көрсету кезінде көрсетілетін қызметті берушілермен өзара іс-қимыл мемлекеттік қызметтер көрсету мониторингінің ақпараттық жүйесін пайдалана отырып жүзеге асырылады.

3) «электрондық үкімет» веб-порталы арқылы;

Электрондық нысанда мемлекеттік қызметтер көрсету Қазақстан Республикасының заңнамасына сәйкес «электрондық үкімет» веб-порталы және «электрондық үкімет» шлюзінде, «электрондық үкіметтің» сыртқы шлюзінде орналасқан сервистермен интеграцияланған ақпараттандыру объектілері арқылы жүзеге асырылады.

Мемлекеттік қызметті электрондық нысанда көрсету нәтижесі электрондық құжатты немесе қағаз жеткізгіштегі құжатты не «электрондық үкіметтің» ақпараттық жүйесінен мәліметтерді беру болып табылады.

4) стационарлық абоненттік құрылғы арқылы;

5) ұялы байланыстың абоненттік құрылғысы арқылы;

Ұялы байланыстың абоненттік құрылғысы арқылы алынған электрондық нысандағы мемлекеттік қызметтерді көрсету нәтижелері «электрондық үкімет» веб-порталындағы пайдаланушының кабинетіне электрондық құжат нысанында, сондай-ақ көрсетілетін қызметті алушының таңдауы бойынша оның абоненттік нөміріне қысқа мәтіндік хабарлама түрінде жіберіледі.

Ұялы байланыстың абоненттік құрылғысы арқылы алынған электрондық нысанда мемлекеттік қызметтер көрсету нәтижелерінің міндетті деректемелері, сондай-ақ олардың дұрыстығын тексеру тәртібі Қазақстан Республикасының ақпараттандыру туралы заңнамасымен реттеледі.

6) орталық мемлекеттік органдар айқындаған ақпараттандыру объектілері арқылы жүзеге асырылады.

Мемлекеттік көрсетілетін қызметтер туралы Заңда 24-бабына сәйкес Қазақстан Республикасында мемлекеттік көрсетілетін қызметтер Қазақстан Республикасының заңдарына сәйкес ақылы немесе тегін негізде көрсетіледі.

Қазақстан Республикасының заңдарында тегін ұсынылуға кепілдік берілген мемлекеттік қызметтерді көрсеткені үшін көрсетілетін қызметті алушыға төлемақы белгілеуге жол берілмейді.