Жеке тұлғаның жылдық кірісіне оның кірістерінің барлық түрлері, оның ішінде дара кәсіпкер болып табылмайтын жеке тұлға, жеке практикамен айналысатын тұлға алған мүліктік кірістен басқа, тауарларды өткізуден, жұмыстарды орындаудан, қызметтер көрсетуден түсетін кіріс кіреді.

2026 жылғы 1 қаңтардан бастап жылдық кіріс

2026 жылғы 1 қаңтарға дейінгі жылдық кіріс 

2026 жылғы 1 қаңтардан бастап жылдық кіріс

ҚР Салық кодексінің 371-бабында белгіленгендей:

1. Жеке тұлғаның жылдық кірісі осы тұлға Қазақстан Республикасында және оның шегінен тысқары жерде салықтық кезең ішінде:

1) төлем көзінен;

2) жеке тұлғаның дербес салық салуына жататын кірістер түрінде алуға жататын (алынған) кірістерден тұрады.

2. Жеке тұлғаның жылдық кірісіне оның мынадай кірістерінің барлық түрлері кіреді:

1) үй жұмыскерінің кірісін қоса алғандағы, жұмыскердің кірісі;

2) резидент-еңбекші көшіп келушінің кірісі;

3) өтеусіз алынған мүлік түріндегі кіріс;

4) біржолғы зейнетақы төлемдері түріндегі кіріс,

5) зейнетақы төлемдері түріндегі кіріс;

6) дивидендтер түріндегі кіріс;

7) сыйақылар түріндегі кіріс;

8) ұтыс түріндегі кіріс;

9) стипендия түріндегі кіріс;

10) сақтандыру шарттары бойынша кіріс;

11) тауарларды өткізуден, жұмыстарды орындаудан, қызметтерді көрсетуден түсетін кіріс;

12) мүліктік кіріс;

13) дара кәсіпкердің кірісі;

14) жеке практикамен айналысатын адамның кірісі;

15) жеке қосалқы шаруашылықтан түсетін кірістер;

16) басқа да кірістер;

17) осы Кодекстің 399-бабына сәйкес айқындалатын бақыланатын шетелдік компаниялардың немесе бақыланатын шетелдік компаниялардың тұрақты мекемелерінің жиынтық пайдасы.

3. Мынадай:

1) салық агенті болып табылмайтын тұлғадан осындай кірістер алған жағдайда – жеке тұлғаның дербес;

2) осы баптың 2-тармағының 12) – 14) тармақшаларында көрсетілген кірістерден басқа, салық агентінен осындай кірістер алған жағдайда – салық агентінің осы баптың 2-тармағында көрсетілген кірістерге салық салуына жатады.

4. ҚР СК 371-бабының ережелері ҚР СК 365-бабында көрсетілген, жеке тұлғаның кірісі ретінде қаралмайтын экономикалық пайдаға қолданылмайды.

Төлем көзінен ұсталатын ЖТС, сондай-ақ салықты есептеу, ұстау және төлеу

1. ЖТС есептеуді, ұстап қалуды және бюджетке төлеуді, егер мұндай кірістер салық агентінің төлеуіне жататын болса (төлесе), төлем көзінен аталған салық агенті ҚР СК 425-бабында көрсетілген кірістер бойынша жүзеге асырады.

2. Төлем көзінен салық салуға жататын кірістер бойынша ЖТС есептеуді салық агенті салық салуға жататын кірісті есепке жазу кезінде жүргізеді.

ЖТС сомасы ҚР СК 363-бабында белгіленген мөлшерлемелерді, жұмыскердің кірісін қоспағанда, осы бөлімге сәйкес айқындалатын төлем көзінен салық салынатын тиісті кіріс сомасына қолдану арқылы есептеледі.

• 8 500 АЕК дейін – 10%;
• 8 500 АЕК-тен жоғары – 8 500 АЕК мөлшерінде салық салынатын кірістен алынатын салық сомасы + одан асатын сомадан 15%;
• жеке практикамен айналысатын тұлғаның кірісі - 9%;

күнтізбелік жыл үшін салық салынатын дивидендтер түріндегі кіріс:

• 230 000 АЕК-ке дейін – 5%;
• 230 000 АЕК-тен жоғары – 230 000 АЕК мөлшеріндегі салық салынатын кірістен алынатын салық сомасы + одан асатын сомадан 15%;

 жалпыға бірдей белгіленген салық салу тәртібін қолданатын ДК-нің, шаруа немесе фермер қожалығының күнтізбелік жыл ішіндегі салық салынатын кірісі:

• 230 000 АЕК-ке дейін – 10%;

• 230 000 АЕК-тен жоғары – 230 000 АЕК мөлшерінде салық салынатын кіріс салығының сомасы + одан асатын соманың 15%

Жұмыскердің кірісі бойынша ЖТС сомасы ҚР СК 441-бабында белгіленген тәртіппен есептеледі.

3. Салық агенті ЖТС ұстап қалуды төлем көзінен салық салуға жататын кірісті төлеу күнінен кешіктірмей жүргізеді.

4. Салық агенті төленген кірістер бойынша ЖТС аударуды кіріс төлеу жүзеге асырылған ай аяқталғаннан кейін күнтізбелік жиырма бес күннен кешіктірмей өзінің тұрған жері бойынша жүзеге асырады.

5. Салық агентінің құрылымдық бөлімшелері жұмыскерлерінің кірістері бойынша ЖТС аудару осы құрылымдық бөлімшелердің тұрған жері бойынша тиісті бюджеттерге жүргізіледі.

6. Резидент-заңды тұлға өз шешімімен өзінің құрылымдық бөлімшесінің:

• төлем көзінен салық салуға жататын, осындай құрылымдық бөлімше есепке жазған, төлеген кірістер бойынша ЖТС есептеу, ұстап қалу және аудару;
• осындай құрылымдық бөлімшенің шығыстары болып табылатын салық салу объектілері бойынша әлеуметтік салықты есептеу және төлеу жөніндегі міндетті бір мезгілде орындағанын тануға құқылы.

Бұл ретте резидент-заңды тұлғаның осындай шешімі:

• заңды тұлғаның жаңадан құрылған құрылымдық бөлімшесіне қатысты – осы құрылымдық бөлімше құрылған күннен бастап немесе осы құрылымдық бөлімше құрылған тоқсаннан кейінгі тоқсанның басынан бастап;
• қалған жағдайларда – осындай шешім қабылданған тоқсаннан кейінгі тоқсанның басынан бастап қолданысқа енгізіледі.

Резидент-заңды тұлғаның осындай шешімінің күшін жою осындай шешімнің күші жойылған тоқсаннан кейінгі тоқсанның басынан бастап қолданысқа енгізіледі.

Жұмыскердің кірісінен ЖТС есептеу

Жұмыскердің кірісінен төлем көзінен ұсталатын ЖТС есептеуді салықтық кезең үшін салық агенті мынадай формула бойынша жүргізеді:

     ҚР СК 363-бабы 1) тармақшасы кестесінің 1-жолында көзделген сома шегінде күнтізбелік жылдың 1 қаңтарынан бастап жеке табыс салығы есептелетін салықтық кезеңді қоса алғанда, өсу қорытындысымен айқындалатын, ҚР СК 439-бабының 1-тармағына сәйкес салық агентінен алынуға жататын жұмыскердің салық салынатын кірісінің сомасы,

      көбейту

ҚР СК 363-бабы 1) тармақшасы кестесінің 1-жолына сәйкес салық мөлшерлемесі

      қосу

ҚР СК 439-бабының 1-тармағына сәйкес салық агентінен алынуға жататын, күнтізбелік жылдың 1 қаңтарынан бастап ЖТС есептелетін салықтық кезеңді қоса алғанда, өсу қорытындысымен айқындалатын жұмыскердің салық салынатын кірісінің ҚР СК 363-бабы 1) тармақшасы кестесінің 1-жолында көзделген сомадан асып кету сомасы,

      көбейту

ҚР СК 363-бабы 1) тармақшасы кестесінің 2-жолына сәйкес салық мөлшерлемесі

      алу

күнтізбелік жылдың алдыңғы салықтық кезеңдер үшін салық агенті өсу қорытындысымен 1 қаңтардан бастап есептеген ЖТС сомасы.

2026 жылғы 1 қаңтарға дейінгі жылдық кіріс

Жеке тұлғаның жылдық кірісі осы тұлға Қазақстан Республикасында (бұдан әрі – ҚР) және оның шегінен тыс жерде салықтық кезең ішінде:

1) төлем көзінен;

2) жеке тұлға дербес салық салуға жататын кірістер түрінде алуға жататын (алған) кірістерінен тұрады (Салық кодексінің 319-бабының 1-тармағы).

Жеке тұлғаның жылдық кірісіне мынадай кірістерінің барлық түрі кіреді:

1) жұмыскердің кірісі, оның ішінде үй жұмыскерінің кірісі және резидент-еңбекші көшіп келушінің кірісі;

2) дара кәсіпкер, жеке практикамен айналысатын адам болып табылмайтын жеке тұлға алған, мүліктік кірістен басқа, тауарларды өткізуден, жұмыстарды орындаудан, қызметтерді көрсетуден түсетін кіріс;

3) жеке тұлға алған тауарлардың, орындалған жұмыстардың, көрсетілген қызметтердің құнын үшінші тұлғаның төлеуі түріндегі кіріс;

4) жеке тұлға алдындағы берешекті өтеу есебіне орындалған (көрсетілген) жұмыстар, қызметтер түріндегі кіріс;

5) өтеусіз алынған мүлік, оның ішінде жұмыстар, көрсетілетін қызметтер түріндегі кіріс;

6) борышты кешіру түріндегі кіріс;

7) есептен шығарылған айыппұлды, өсімпұлды және басқа да санкция түрлерін қоспағанда, борышкерге қойылатын талап мөлшерін азайту түріндегі кіріс;

8) репо операциялары бойынша сыйақы төлеу түріндегі кіріс;

9) зейнетақы төлемдері, біржолғы зейнетақы төлемдері түріндегі кіріс;

10) дивидендтер, сыйақылар, ұтыстар түріндегі кіріс;

11) стипендия түріндегі кіріс;

12) жинақтаушы сақтандыру шарттары бойынша кіріс;

13) мүліктік кіріс;

14) дара кәсіпкердің кірісі;

15) жеке практикамен айналысатын адамның кірісі;

16) Қазақстан Республикасының заңнамасына сәйкес шаруашылық бойынша есепке алу кітабында есепке алынған жеке қосалқы шаруашылықтан түсетін, салық салуға жататын, оның ішінде жеке қосалқы шаруашылықпен айналысатын тұлғаның салық агентіне анық емес мәліметтерді ұсынуына байланысты төлем көзінен жеке табыс салығын ұстап қалу жүргізілмеген кірістер;

17) осы баптың 1) – 16) тармақшаларында көрсетілмеген, Қазақстан Республикасында немесе Қазақстан Республикасының шегінен тыс жердегі көздерден алынған басқа да кірістер;

18) бақыланатын шетелдік компаниялардың немесе бақыланатын шетелдік компаниялар тұрақты мекемелерінің осы Кодекстің 340-бабына сәйкес айқындалатын жиынтық пайдасы.

Салық кодексінің 320-бабында ЖТС салық төлеушінің кірістеріне салық салу үшін 10 пайыз мөлшерлемесі белгіленген.

Бұл ретте ҚР шегінен тыс төленген кіріске салынатын салықтардың немесе ЖТС-ға ұқсас өзге де шетелдік салықтың сомасы резидент ЖТ ҚР шегінен тыс көздерден алған кірістерден Салық кодексінің 303-бабында айқындалған тәртіппен ҚР-да ЖТС төлеу есебіне осындай шетелдік табыс салығының төленгенін растайтын құжат болған кезде ЖТС мөлшерлемесі шегінде есепке жатқызуға жатады. (Салық кодексінің 359-бабының 1-тармағы).

ЖТС бойынша декларацияны салық төлеушілер - ЖТ, оның ішінде Қазақстан Республикасынан тысқары жерлердегі көздерден табыс алғандар ұсынады (Салық кодексінің 363-бабының 1-тармағы).