Бизнес-сәйкестендіру нөмірі (БСН) – бұл қызметін бірлескен кәсіпкерлік түрінде жүзеге асыратын заңды тұлға (филиал мен өкілдік) және дара кәсіпкер үшін қалыптастырылатын бірегей нөмір. (Сәйкестендіру нөмірлерінің ұлттық тізілімдері туралы Заңның 1-бабы)

БСН - Бизнес сәйкестендіру нөмірі, сәйкестендіру үшін ұйымдарға беріледі.

Қазақстан Республикасындағы (ҚР) барлық заңды тұлғалардың бизнес-сәйкестендіру нөмірлері болуы қажет.

Барлық БСН тіркеу есебі арнайы ақпараттық жүйеде – бизнес-сәйкестендіру нөмірлерінің ұлттық тізілімінде жүзеге асырылады. БСН барлық мемлекеттік органдар мен өзге де мемлекеттік мекемелер үшін бірыңғай сәйкестендіргіш болып табылады.

БСН қандай құжаттарда бар

БСН қалыптастыру

БСН қалай алуға болады

БСН қайдан алуға болады

БСН сандарының мәні

БСН қандай құжаттарда бар

Бизнес-сәйкестендіру нөмірі бар құжаттар Сәйкестендіру нөмірлерінің ұлттық тізілімдері туралы заңның 9-бабында белгіленгендей:

- резидент заңды тұлғалар, олардың филиалдары (өкілдіктері) үшiн – заңды тұлғаны мемлекеттiк тiркеу (қайта тiркеу) туралы анықтама, филиалды (өкiлдiктi) есептiк тiркеу (қайта тiркеу) туралы анықтама;

- қызметiн филиал мен өкiлдiк арқылы (тұрақты мекеме құра отырып) Қазақстан Республикасында жүзеге асыратын резидент емес заңды тұлғалар үшiн – филиалды (өкiлдiктi) есептiк тiркеу (қайта тiркеу) туралы анықтама;

- мыналар:

• «Салық және бюджетке төленетін басқа да міндетті төлемдер туралы» Қазақстан Республикасы Кодексінің (Салық кодексі) 650-бабының 8-тармағына сәйкес салық агенттері болып табылатын;
• Қазақстан Республикасында салық салу объектілерін иеленетін;
• Қазақстан Республикасында аккредиттелген шет мемлекеттің дипломатиялық және оларға теңестірілген өкілдіктері болып табылатын;
• «Салық және бюджетке төленетін басқа да міндетті төлемдер туралы» Қазақстан Республикасы Кодексінің (Салық кодексі) 220-бабының 9-тармағына сәйкес қызметін өзінің тұрақты мекемесі ретінде қаралатын тәуелді агент арқылы жүзеге асыратын бейрезидент-заңды тұлғалар үшін тіркеу куәлігі болып табылады.

БСН қалыптастыру

Бизнес-сәйкестендіру нөмірін қалыптастыру:

1) бiрлескен дара кәсiпкерлiк түрiнде қызметiн жүзеге асыратын дара кәсiпкерлер үшiн бiрлескен дара кәсiпкерлiктi мемлекеттiк тiркеу кезiнде бiр мезгiлде;

2) резидент заңды тұлғалар, олардың филиалдары мен өкiлдiктерi үшiн оларды тiркеу кезiнде бiр мезгiлде;

3) Қазақстан Республикасында филиалдар мен өкiлеттiктер арқылы (тұрақты мекеме құра отырып) қызметiн жүзеге асыратын резидент емес заңды тұлғалар үшiн оларды есептiк тiркеу кезiнде бiр мезгiлде;

4) мыналар:

• «Салық және бюджетке төленетін басқа да міндетті төлемдер туралы» Қазақстан Республикасы Кодексінің (Салық кодексі) 650-бабының 8-тармағына сәйкес салық агенттері болып табылатын;
• Қазақстан Республикасында аккредиттелген шет мемлекеттің дипломатиялық және оларға теңестірілген өкілдіктері болып табылатын;
• «Салық және бюджетке төленетін басқа да міндетті төлемдер туралы» Қазақстан Республикасы Кодексінің (Салық кодексі) 220-бабының 9-тармағына сәйкес қызметін өзінің тұрақты мекемесі ретінде қаралатын тәуелді агент арқылы жүзеге асыратын;
• филиал, өкілдік ашпай қызметін тұрақты мекеме арқылы жүзеге асыратын;
• Қазақстан Республикасында салық салу объектілерін иеленетін;
• резидент-банктерде, бейрезидент-банктердің филиалдарында ағымдағы шоттар ашатын бейрезидент-заңды тұлғаларды мемлекеттік кірістер органында салық төлеушілер ретінде тіркеу кезінде жүзеге асырылады.

БСН қалай алуға болады

БСН әділет органдары қайта тіркеуге кез келген өтініш жасаған кезде автоматты түрде беріледі.

БСН ресімдеу үшін тіркеуші органға мынадай құжаттарды ұсыну қажет:

• белгіленген нысан бойынша өтініш;
• заңды тұлғаның құрылтай құжаттарының (Жарғының, құрылтай шартының) түпнұсқасы;
• филиалдың ережесі;
• заңды тұлғаны, филиалды немесе өкілдікті мемлекеттік тіркеу туралы куәліктің түпнұсқасы;
• статистикалық картаның көшірмесі.

Егер бұл құжаттарды ұйымның бiрiншi басшысы тапсырмаса, онда өзiмен бiрге фирманың бiрiншi адамының қолы және мөрi қойылған құжаттарды беру және алу үшiн берiлген сенiмхатты алу қажет. Құжаттарды ұсынғаннан кейін тіркеуші орган тіркеу туралы куәлікті қайта ресімдеу туралы бұйрық шығарады және БСН көрсетілген анықтама береді.

Заңды тұлғаның мынадай құжаттары БСН қамтуы тиіс:

• резидент заңды тұлғалар, олардың филиалдары мен өкілдіктері үшін - заңды тұлғаны мемлекеттік тіркеу (қайта тіркеу), филиалды, өкілдікті есептік тіркеу (қайта тіркеу) туралы куәлік;
• Қазақстан Республикасында қызметін филиалдар мен өкілдіктер (тұрақты мекеме құра отырып) арқылы жүзеге асыратын бейрезидент заңды тұлғалар үшін – филиалды, өкілдікті есептік тіркеу (қайта тіркеу) туралы куәлік;

Заңды тұлғаларға БСН беру тегін жүргізіледі.

Шағын кәсіпкерлік субъектілерін, олардың филиалдары мен өкілдіктерін мемлекеттік (есептік) тіркеу немесе қайта тіркеу туралы бұрын берілген куәліктерді қайта ресімдеу қажетті құжаттармен қоса өтініш берілген күннен бастап үш жұмыс күнінен кешіктірілмей, ал өзге заңды тұлғаларды, олардың филиалдары мен өкілдіктерін қайта ресімдеу қажетті құжаттармен қоса өтініш берілген күннен бастап он жұмыс күнінен кешіктірілмей жүргізіледі.

БСН қайдан алуға болады

Сәйкестендіру нөмірін беру орналасқан жері бойынша тіркеуші органда жүзеге асырылады.

БСН сандарының мәні

БСН 12 цифрды қамтиды және заңды тұлға туралы ақпаратты қамтиды.

1) бірінші бөлік - 4 цифрдан тұрады және заңды тұлғаны, филиалдар мен өкілдіктерді немесе бірлескен кәсіпкерлік түріндегі (бұдан әрі – ЖК (Б)) қызметті жүзеге асыратын дара сан кәсіпкерді мемлекеттік (есептік) тіркеу не қайта тіркеу жылын (соңғы екі цифр) және айын немесе АХҚО-ның органдарын, олардың ұйымдарын және АХҚО-ның қатысушыларын заңды тұлға, филиалдар мен өкілдіктер ретінде тіркеу не қайта тіркеу жылын (соңғы екі цифр) және айын қамтиды;

2) екінші бөлік - 1 цифрдан тұрады және заңды тұлғаның немесе ЖК (Б) типін білдіреді.
Заңды тұлғаның немесе ЖК (Б) типінің нақты мәні:
4 - резидент заңды тұлғалар үшін;
5 - бейрезидент заңды тұлғалар үшін;
6 - ЖК (Б) үшін;

3) үшінші бөлік - 1 цифрдан тұрады және қосымша белгі болып табылады және мынадай түрде айқындалады:
0 - заңды тұлғаның немесе ЖК (Б) бас бөлімшесінің;
1 - заңды тұлғаның немесе ЖК (Б) филиалының;
2 - заңды тұлғаның немесе ЖК (Б) өкілдігінің;
3 - бірлескен кәсіпкерлік негізінде қызметін жүзеге асыратын шаруа (фермер) қожалығының;

4) төртінші бөлік - 5 цифрдан тұрады және заңды тұлғаның (филиалдар мен өкілдіктер) немесе ЖК (Б) жүйесіндегі реттік тіркеу нөмірін қамтиды. АХҚО органдарына, олардың ұйымдарына және АХҚО-ның қатысушыларына бірінші саннан, 90001 нөмірінен бастап 99999 нөмірін қоса алғанда реттік нөмір беріледі.

5) бесінші бөлік - автоматты түрде анықталатын және бақылау цифры болып табылатын 1 цифрдан тұрады.

Сервис Учет. Контрагенті тексеру