ҚР Еңбек кодексінің 135-бабына сәйкес - Жұмыс беруші вахталық әдіспен жұмыс істейтін жұмыскерлерді жұмыс өндірісі объектісінде болған кезеңде тыныс-тіршілігін қамтамасыз ету үшін тұрғын үймен қамтамасыз етуге және олардың тамақтануын, жиналу пунктінен жұмыс орнына дейін және кері қарай жеткізіп салуды ұйымдастыруға, сондай-ақ жұмыстарды орындау және ауысымаралық тынығу үшін жағдаймен қамтамасыз етуге міндетті.

Жұмыс беруші еңбек, ұжымдық шарттарға және (немесе) жұмыс беруші бекітетін вахталық жұмыс әдісі туралы ережеге сәйкес вахталық жұмыс әдісін қолдану тәртібін айқындайды, сондай-ақ жұмыскердің жұмыс жүргізілетін объектіде және тұру үшін арнайы жабдықталған орындарда (вахталық кенттерде) болуына қажетті жағдайларды қамтамасыз етеді.

Демек, жұмыс беруші жұмысшыларды орындалатын жұмыс орнына жеткізетін көлікті ұсынуға міндетті.

Жұмыс берушінің жұмыскерлерді жеткізуге байланысты шығыстарын ресімдеу

Салық кодексінің 322-бабының 1-тармағына сәйкес салық агенті болып табылатын жұмыс беруші есепке жазған және, оның ішінде Қазақстан Республикасының бухгалтерлік есеп пен қаржылық есептілік туралы заңнамасына сәйкес жұмыс берушінің бухгалтерлік есебінде шығыстар (шығындар) ретінде танылған мынадай кірістер жұмыскердің салық салуға жататын кірістері болып табылады:

1) еңбек қатынастарының болуына байланысты жұмыс беруші жұмыскердің меншігіне беруге жататын, қолма-қол және (немесе) қолма-қол емес нысандарындағы ақша;

2) осы Кодекстің 323-бабына сәйкес жұмыскердің заттай нысандағы кірістері;

3) осы Кодекстің 324-бабына сәйкес жұмыскердің материалдық пайда түріндегі кірістері.

Салық кодексінің 323-бабының негізінде мыналар жұмыскердiң салық салуға жататын, заттай нысандағы кірісі болып табылады:

4) жұмыскер жұмыс берушіден немесе үшінші тұлғалардан алған тауарлардың, орындалған жұмыстардың, көрсетілген қызметтердің құнын жұмыс берушiнiң жұмыскерге немесе үшінші тұлғаларға төлеуi.

Осылайша, жұмыс берушінің жұмыскерге жол жүру шығыстарын өтеуі жұмыскердің заттай нысандағы кірісі болып танылады, оған барлық жалақы салықтары мен әлеуметтік төлемдер: МЗЖ, МӘМСЖ, ЖТС, ӘА, ӘС, МӘМСА салынады.

Жұмыскерге табыс жалақы арқылы есептеудiң жеке түрiмен есептеледi. Жұмыскерге табысты есептеуді: жол ақысын растайтын бастапқы құжаттар және жол жүру құжаттары негізінде ресімдейсіз.