Жұмыскердің жеке карточкасы (Т-2- нысаны) ұйымның кадр қызметі міндетті түрде ресімдейтін құжаттарға жатады.

Осы құжаттың көмегімен компания ҚР заңды тұлғаларына міндеттемелердің бірін - әскери есепке алуды орындайды. Қазақстандық компаниялардың осы іс-шараны жүзеге асыруы туралы талап ҚР Қорғаныс министрінің 2017 жылғы 24 қаңтардағы № 28 бұйрығымен бекітілген Әскери міндеттілер мен әскерге шақырылушыларды әскери есепке алу қағидаларында (бұдан әрі – Қағидалар) қамтылған.

Заңды тұлғалардың әскери есепке алуды жүргізуі Қағидаларға сәйкес жеке карточкалар (Т-2) (осы Қағидаларға 6-қосымшаға сәйкес нысан бойынша № Т-2 нысанды жеке карточка (бұдан әрі - жеке карточка) арқылы жүзеге асырылады. Запаста болудың шекті жасына жеткен азаматтардың немесе әскери есептен шығарыла отырып, денсаулық жағдайы бойынша әскери қызметке жарамсыз деп танылған азаматтардың жеке карточкаларында «Жасы бойынша әскери есептен шығарылды» немесе «Денсаулық жағдайы бойынша әскери есептен шығарылды» деген белгі қойылады.

Жеке карточкалар еңбек шартының талаптарымен қабылданған ұйымның барлық қызметкерлеріне, бұл жұмыс орны негізгі болып табылатынына немесе қызметкер қоса қабылданғанына қарамастан ресімделеді.

Жұмысты азаматтық-құқықтық шарттар негізінде орындайтын жұмыскерлерге жеке карточкалар жүргізілмейді.

Жеке карточкаларды толтыру үшін қажетті мәліметтер көзі мынадай құжаттар болып табылады:
1) жұмысқа қабылдау туралы бұйрық;
2) еңбек шарты;
3) жеке куәлік, паспорт (он алты жасқа толмаған адамдар үшін туу туралы куәлік);
4) тұруға ықтиярхат немесе азаматтығы жоқ адамның куәлігі (Қазақстан Республикасының аумағында тұрақты тұратын шетелдіктер немесе азаматтығы жоқ адамдар үшін);
5) еңбек кітапшасы (бар болса);
6) жұмыс беруші қол қойған, не нотариалды, не ұйымның мөрімен расталған қызметтік тізім (жұмыскердің жұмысы, еңбек қызметі туралы мәліметтер тізбесі);
7) әскери есепке алу құжаты;
8) алдын ала медициналық куәландырудан өткені туралы құжат (ҚР ЕК және ҚР заңнамасына сәйкес осындай медициналық куәландырудан өтуге міндетті адамдар үшін);
9) тиісті білім мен дағдыны талап ететін жұмысқа (лауазымға) түскен жағдайда білімі, біліктілігі, арнайы кәсіптік даярлығының болуы туралы құжат.

Жұмыскерлердің, оның ішінде уақытша жұмыскерлердің жеке карточкаларын сақтау мерзімі - 75 жыл минус жұмыскердің жасы.