Ластаушы заттар деп олар қоршаған ортаға түскен кезде өздерінің сапалық немесе сандық сипаттамаларына байланысты табиғи ортаның табиғи тепе-теңдігін бұзатын, табиғи орта компоненттерінің сапасын нашарлататын, адамның өміріне және (немесе) денсаулығына экологиялық залал не зиян келтіруге қабілетті қатты, сұйық, газ тәрізді немесе бу тәрізді күйдегі кез келген заттар түсініледі.
Осы Кодексте заттар деп олардың табиғи ортадағы табиғи жай-күйiнде болатын немесе адам қызметi нәтижесiнде пайда болатын химиялық элементтер, олардың қосындылары, қоспалары, ерiтiндiлерi мен агрегаттары түсiнiледi.

Қазақстан Республикасы Экология, геология және табиғи ресурстар министрінің 2021 жылғы 25 маусымдағы № 212 бұйрығымен эмиссиялары экологиялық нормалауға жататын ластаушы заттардың тізбесі бекітілді.

Тізбе 01.07.2021 жылдан бастап қолданысқа енгізіледі.

Эмиссиялар нормативтері белгіленетін ластаушы заттардың
тізбесі

1. Атмосфералық ауаны ластайтын заттар:
1) күкірт диоксиді және күкірттің басқа қосылыстары;
2) азот оксиді мен азоттың басқа да қосылыстары;
3) оттегі тотығы;
4) ұшпалы органикалық қосылыстар;
5) металдар мен олардың қосылыстары;
6) тотияйын мен оның қосылыстары;
7) цианидтер;
8) хлор және оның қосылыстары;
9) фтор және оның қосылыстары;
10) шекті көмірсутегілер;
11) меркаптандар;
12) күкіртті сутегі;
13) қара көміртегі (күйе);
14) шаң-тозаң, соның ішінде құрамында асбест бар (РМ2,5, РМ10, өлшемді бөлшектері, талшықтары);
15) полихлорлы дибензодиоксиндер мен полихлорлы дибензофурандар;
16) елді мекендердің атмосфералық ауасындағы шекті рұқсатты шоғырлануының және қауіпсіз әсер етуінің шамамен алынған деңгейі белгіленген өзге де ластаушы заттар мен олардың қосылыстары.

2. Суды ластайтын заттар:
1) галогендердің органикалық қосылыстары және суда осы қосылыстарды құрауы мүмкін заттар;
2) фосфордың органикалық қосылыстары;
3) қалайының органикалық қосылыстары;
4) металдар мен олардың қосылыстары;
5) көмірсутегілер мен олардың қосылыстары;
6) цианидтер;
7) тотияйын мен оның қосылыстары;
8) шекті рұқсатты шоғырлануының және судағы заттардың шекті болжамды деңгейлері белгіленген пестицидтер (улы химикаттар);
9) өлшемді заттар мен суспензиялар;
10) эвтрофикацияға әсер ететін заттар (нитраттар мен фосфаттар);
11) оттегі теңгеріміне қолайсыз әсер ететін заттар;
12) мәдени-тұрмыстық, шаруашылық-ауыз су және балық шаруашылығы су пайдалану су объектілеріндегі шекті рұқсатты шоғырлануының және шекті болжамды деңгейлері белгіленген өзге де ластаушы заттар мен олардың қосылыстары.

Ластаушы заттардың шығарындылары үшін айыппұл есебіне толықтыру енгізілді

Аталған толықтыру «Әкімшілік құқық бұзушылық туралы» Қазақстан Республикасының Кодексіне өзгерістер мен толықтырулар енгізу туралы» 2021 жылғы 2 шілдедегі № 63-VII Заңмен енгізілді.

ӘҚБтК-нің 328-бабының ескертпелері мынадай мазмұндағы 4-тармақпен толықтырылды:

4. Осы баптың бірінші, екінші және үшінші бөліктерінің мақсаттары үшін ілеспе және (немесе) табиғи газды алау етіп жағудан болатын ластағыш заттардың шығарындылары үшін айыппұлды есептеу кезінде "Салық және бюджетке төленетін басқа да міндетті төлемдер туралы" Қазақстан Республикасы Кодексінің (Салық кодексі) 576-бабының 2-тармағында белгіленген стационарлық көздерден ластағыш заттардың шығарындылары үшін төлемақы мөлшерлемелері қолданылады.

Абзац 2021 жылғы 1 шілдеден бастап 2022 жылға дейін енгізіледі. Бұл ретте алаулардағы күкірт диоксидінің, азот диоксидінің шығарындылары үшін тиісінше «Салық және бюджетке төленетін басқа да міндетті төлемдер туралы» Қазақстан Республикасы Кодексінің (Салық кодексі) 576-бабының 2-тармағында белгіленген күкірт тотықтарының, азот тотықтарының шығарындылары үшін төлемақы ставкалары қолданылады. Меркаптанның шығарындылары үшін айыппұлды есептеу кезінде «Салық және бюджетке төленетін басқа да міндетті төлемдер туралы» Қазақстан Республикасы Кодексінің (Салық кодексі) 576-бабының 3-тармағында белгіленген тиісті төлем мөлшерлемесі қолданылады.

2022 жылдан бастап ол мынадай редакцияда жазылсын: Бұл ретте алаулардағы күкірт диоксиді, азот диоксиді, көміртек тотықтары шығарындылары үшін тиісінше "Салық және бюджетке төленетін басқа да төлемдер туралы" (Салық кодексі) Қазақстан Республикасы Кодексінің 576-бабының 2-тармағында белгіленген күкірт оксиді (SOx), азот оксиді (NOx), көміртек монооксиді шығарындылары үшін төлемақы мөлшерлемелері қолданылады. Меркаптанның шығарындылары үшін айыппұлды есептеу кезінде «Салық және бюджетке төленетін басқа да міндетті төлемдер туралы» Қазақстан Республикасы Кодексінің (Салық кодексі) 576-бабының 3-тармағында белгіленген тиісті төлем мөлшерлемесі қолданылады.