Лицензиялық алым - лицензияланатын қызмет түрлерiн жүзеге асыру құқығы үшiн лицензия алушының (лицензиаттың) мiндеттi төлемi.

Алымдар - бұл салық органдары, жергілікті атқарушы органдар және басқа да уәкілетті мемлекеттік органдар алатын бюджетке төленетін бір жолғы төлемдер.

Алымдарды алу кезінде қандай әрекеттер жасалады

Алым төлеуші кім болып табылады

Алымдарды есептеу және төлеу тәртібі

Лицензиялық алым мөлшерлемелері

Жекелеген қызмет түрлерімен айналысу құқығы үшін лицензиялық алым

Алымдарды алу кезінде қандай әрекеттер жасалады

Салық кодексінің 550-бабының 1-тармағына сәйкес салық органдары, жергілікті атқарушы органдар және басқа да уәкілетті мемлекеттік органдар:

1) тіркеу әрекеттері;

2) цифрлық майнерлерге берілетін рұқсат беру құжаттарын қоспағанда, рұқсат беру құжаттарын немесе олардың телнұсқаларын беру жөніндегі әрекеттерді жасау кезінде алымдар алады.

Бұл ретте рұқсат құжаттары деп рұқсаттарға қатысы жоқ, Қазақстан Республикасының заңнамасында белгіленген тәртіппен және жағдайларда қаржы нарығы мен қаржы ұйымдарын реттеу, бақылау және қадағалау жөніндегі уәкілетті орган беретін келісім мен салық органдары беретін, "Астана" халықаралық қаржы орталығының инвестициялық резиденті болып табылатын шетелдіктің немесе азаматтығы жоқ адамның резиденттігін растайтын құжат та түсініледі.

Тіркеу әрекеттері деп уәкілетті мемлекеттік органдардың Қазақстан Республикасының заңнамасында айқындалған тәртіппен мынадай әрекеттер жасауы түсініледі:

1) заңды тұлғаларды мемлекеттік тіркеу және филиалдар мен өкілдіктерді есептік тіркеу, сондай-ақ оларды қайта тіркеу;

3) жылжымалы мүлік кепілін және кеме ипотекасын мемлекеттік тіркеу, сондай-ақ әуе кемесін тіркеуден алып тастауға және әкетуге қайтарып алынбайтын өкілеттікті мемлекеттік тіркеу;

4) ғарыш объектілерін және оларға құқықтарды мемлекеттік тіркеу;

5) көлік құралдарын мемлекеттік тіркеу, сондай-ақ оларды қайта тіркеу;

6) дәрілік заттар мен медициналық бұйымдарды мемлекеттік тіркеу, сондай-ақ оларды қайта тіркеу;

8) теле- радиоарнаны, мерзiмдi баспасөз басылымын, ақпараттық агенттiкті және желілік басылымды есепке қою.

Алым төлеуші кім болып табылады

Салық кодексінің 551-бабында көрсетілгендей уәкілетті мемлекеттік органдар жүзеге асыру кезінде алымдар алу көзделген әрекеттерді олардың мүдделері үшін жасайтын тұлғалар, сондай-ақ заңды тұлғалардың құрылымдық бөлімшелері алым төлеушілер болып табылады.

Қазақстан Республикасының әлеуметтік қорғау туралы және халықтың көші-қоны саласындағы заңнамасында айқындалатын жағдайларда шетелдік жұмыс күшін тартатын тұлғалар Қазақстан Республикасына шетелдік жұмыс күшін тартуға рұқсатты бергені немесе ұзартқаны үшін алым төлеушілер болып табылмайды.

Алымдарды есептеу және төлеу тәртібі

Осы Кодекстің 550-бабының 3-1-тармағында көзделген жағдайларды қоспағанда, алым сомалары белгіленген мөлшерлемелер бойынша есептеледі және уәкілетті мемлекеттік органға және жергілікті атқарушы органға тиісті құжаттар берілгенге дейін немесе рұқсат құжаттары алынғанға дейін алым төлеушінің тұрған жері бойынша төленеді.

Лицензиялық алым мөлшерлемелері

Жекелеген қызмет түрлерiмен айналысу құқығы үшiн лицензиялық алым ставкалары (жекелеген қызмет түрлерiмен айналысуға лицензия бергенi үшiн алынатын алым) ҚР Салық кодексі 554-бабында регламенттелген және республикалық бюджет туралы заңда белгіленген және осындай алымдар төлеу күніне қолданыста болатын еселенген АЕК мөлшерінде айқындалады.

Жекелеген қызмет түрлерімен айналысу құқығы үшін лицензиялық алым

«Рұқсаттар және хабарламалар туралы» Заңның 31-бабына сәйкес - Жекелеген қызмет түрлерімен айналысу құқығы үшін лицензиялық алым (бұдан әрі - лицензиялық алым) ҚР Салық кодексіне сәйкес лицензия (лицензияның телнұсқасын) беру (қайта ресімдеу) кезінде, сондай-ақ ҚР Салық кодексінде көзделген өзге де жағдайларда алынады.

Лицензиялық алым мөлшермелері ҚР Салық кодексімен белгіленеді.

Көмірсутектер саласындағы қызметтің кіші түрлерін қоспағанда, лицензияға қосымшаларды, лицензияға қосымшалардың телнұсқаларын беру кезінде лицензиялық алым алынбайды.

Көмірсутектер саласында лицензиялық алым мөлшерлемесі қызметтің жекелеген кіші түрлерімен айналысу құқығы үшін алынады.

«Рұқсаттар және хабарламалар туралы» Заңның 44-бабында көзделген жағдайларда лицензиялар және (немесе) лицензияға қосымшалар беру кезінде лицензиялық алым алынбайды.

Бiрыңғай бюджеттiк сыныптамаға сәйкес 105402 коды Жекелеген қызмет түрлерiмен айналысу құқығы үшiн лицензиялық алым жекелеген қызмет түрлерiмен айналысу құқығы үшiн алым төлеуге арналған.