СЕН 560.00 - Тарихи шығындарды өтеу бойынша төлем жөніндегі декларация

2026 жылғы 1 қаңтардан бастап тарихи шығындарды өтеу бойынша төлем жөніндегі декларация (560.00-нысан)

2026 жылғы 1 қаңтарға дейінгі тарихи шығындарды өтеу бойынша төлем жөніндегі декларация (560.00-нысан)

 

2026 жылғы 1 қаңтардан бастап тарихи шығындарды өтеу бойынша төлем жөніндегі декларация (560.00-нысан)

Жаңа Салық кодексі (2025 жылғы 18 шілдедегі № 214-VIII ҚР Кодексі) 2026 жылғы 1 қаңтардан бастап күшіне енді.

2026 жылғы 1 қаңтардан бастап салықтық есептілік 30%-ға қысқарды.

Қазақстан Республикасы Қаржы министрінің 2025 жылғы 12 қарашадағы № 695 бұйрығымен олардың жасалуы бойынша түсіндірмесі бар салықтық есептілік нысандары және 2026 жылғы 01 қаңтардан бастап оларды ұсыну қағидалары бекітілді. Тарихи шығындарды өтеу бойынша төлем жөніндегі декларация (560.00-нысан) салықтық есептілік нысандарының тізбесінде жоқ.

Осылайша, 2026 жылға Тарихи шығындарды өтеу бойынша төлем жөніндегі декларация (560.00-нысан) тапсырылмайды. Тарихи шығындарды өтеу бойынша төлем бойынша көрсеткіштер СЕН 590.00 жеке қосымшасына енгізілген.

2026 жылғы 1 қаңтарға дейінгі Тарихи шығындарды өтеу бойынша төлем жөніндегі декларация (560.00-нысан)

«Тарихи шығындарды өтеу бойынша төлем жөніндегі декларация» тарихи шығындарды өтеу бойынша төлемді есептеуге арналған.

560.00-нысаны жөніндегі декларацияны жер қойнауын пайдалануға арналған келісімшарт жасалғанға дейін тиісті келісімшарттық аумақты геологиялық зерттеуге және жайластыруға мемлекет шығындар шеккен пайдалы қазбалар кен орындары бойынша Қазақстан Республикасының заңнамасында белгіленген тәртіппен жер қойнауын пайдалануға арналған келісімшарт жасасқан жер қойнауын пайдаланушылар жасайды.

Төлем төлеушілер

Кім төлемді төлеуші болып табылмайды

Төлеу тәртібі, мерзімі, салық Декларациясы

Төлем төлеушілер

Жер қойнауын пайдалануға арналған келісімшартты жасасқанға дейін келісімшарт аумағын (жер қойнауы учаскесін) геологиялық зерделеуге және кен орындарын барлауға мемлекет шығын шеккен пайдалы қазбалардың кен орындары бойынша жер қойнауын пайдалануға арналған келісімшарт шеңберінде қызметті жүзеге асыратын жер қойнауын пайдаланушылар тарихи шығындарды өтеу бойынша төлемді төлеушілер болып табылады.

Кім төлемді төлеуші болып табылмайды

Пайдалы қатты қазбаларды барлауға немесе өндіруге арналған лицензия шеңберінде қызметін жүзеге асыратын жер қойнауын пайдаланушы бір мезгілде мынадай талаптар сақталған кезде:

• пайдалы қатты қазбаларды барлауға немесе өндіруге арналған лицензия Қазақстан Республикасының жер қойнауы және жер қойнауын пайдаланушылар туралы заңнамасына сәйкес 2017 жылғы 31 желтоқсаннан кейін берілсе;
• пайдалы қатты қазбаларды барлауға немесе өндіруге арналған лицензия берілген аумақ Қазақстан Республикасының жер қойнауы және жер қойнауын пайдаланушылар туралы заңнамасына сәйкес жер қойнауын пайдалануға арналған келісімшарттар бойынша жер қойнауын пайдалану құқығы 2018 жылғы 1 қаңтарға дейін берілген аумаққа жатпайтын болса, тарихи шығындарды өтеу бойынша төлемді төлеуші болып табылмайды.

Тарихи шығындарды өтеу бойынша төлем жер қойнауын пайдалануға арналған келісімшарт жасалғанға дейін келісімшарттық аумақты (жер қойнауы учаскесін) геологиялық зерттеуге және кен орындарын барлауға мемлекет шеккен жиынтық шығындарды өтеу бойынша жер қойнауын пайдаланушының тіркелген төлемі болып табылады.

Төлеу тәртібі, мерзімі, салық Декларациясы

Тарихи шығындарды өтеу жөнiндегi төлемдi төлеу тәртiбi мен мерзiмдерi ҚР СК 734-бабымен регламенттелген.

Салық декларациясы.

1. Егер келісімшарт аумағын (жер қойнауы учаскесін) геологиялық зерделеуге және кен орындарын барлауға мемлекет шеккен тарихи шығындарды өтеу бойынша төлемнің жалпы мөлшері республикалық бюджет туралы заңда белгіленген және құпиялылық туралы келісім жасалған күнге қолданыста болатын АЕК-тің 10 000 еселенген мөлшеріне тең немесе одан кем соманы құраса, онда жер қойнауын пайдаланушы тұрған жеріндегі салық органына декларацияны жер қойнауын пайдаланушының пайдалы қазбаларды өндіруге кіріскен жылынан кейінгі жылдың 31 наурызынан кешіктірмей тапсырады.

2. Егер келісімшарт аумағын (жер қойнауы учаскесін) геологиялық зерделеуге және кен орындарын барлауға мемлекет шеккен тарихи шығындарды өтеу бойынша төлемнің жалпы мөлшері республикалық бюджет туралы заңда белгіленген және құпиялылық туралы келісім жасалған күнге қолданыста болатын АЕК-тің 10 000 еселенген мөлшерінен асатын соманы құраса, онда жер қойнауын пайдаланушы тұрған жеріндегі салық органына декларацияны тоқсан сайын, есепті тоқсаннан кейінгі екінші айдың 15-күнінен кешіктірмей тапсырады.

2009 жылғы 1 қаңтарға дейін жасалған, олар бойынша жер қойнауын пайдаланушы 2009 жылғы 1 қаңтарға дейін пайдалы қазбаларды өндіруге кіріскен жер қойнауын пайдалануға арналған келісімшарттар бойынша, егер 2009 жылғы 1 қаңтардағы жағдай бойынша тарихи шығындардың бюджетке өтелмеген сомасы 2009 жылғы 1 қаңтарға республикалық бюджет туралы заңда белгіленген АЕК-тің 10 000 еселенген мөлшерінен асатын соманы құраса, онда декларацияны жер қойнауын пайдаланушы тұрған жеріндегі салық органына тоқсан сайын, есепті тоқсаннан кейінгі екінші айдың 15-күнінен кешіктірмей тапсырады.

«Тарихи шығындарды өтеу бойынша төлем жөніндегі декларация (560.00-нысан)» салықтық есептілігін жасау қағидалары